Onstuimigheid tydens rugbyklub se vergadering
Die Barbarians-rugbyklub se algemene jaarvergadering verlede week, is gekenmerk aan gemoedere wat hoog geloop het asook vurige debat aangaande lidmaatskap.
Die vergadering het in die Portao Diaz Hotel plaasgevind verlede Donderdag, 1 November. Ongelukkigheid het ontstaan toe verskeie lede van die gemeenskap, sommige voormalige lede asook borge van die klub, toegang tot die vergadering geweier is vanweë onbetaalde lidmaatskapfooie.
Met aanvang van die vergadering, het verskeie lede kapsie gemaak teen die feit dat nie almal wat vir die vergadering opgedaag het, toegelaat is om die verrigtinge by te woon nie. Die voorsitter, Dawid Kamfer het die vergadering telkemale tot orde geroep deur te verwys na die klub se grondwet, wat uitstip dat slegs opbetaalde lede aan die verkiesing van die nuwe bestuur mag deelneem. Ongelukkige partye binne die vergadering is egter nie deur hierdie verduideliking tevrede gestel nie en gemoedere het kort-kort weer opgevlam.
Stigterslede wat die vergadering bygewoon het, het lede gemaan tot kalmte en hulle daaraan herinner dat die klub aan die gemeenskap behoort en juis daar is om mekaar op te bou en nie af te breek nie. In sy voorsittersverslag het Kamfer die uitdagings asook die suksesse van die afgelope jaar uitgestip. Hy het te kenne gegee dat die besluit om die klub te lei nie 'n maklike een was nie, vanweë die feit dat hy as ICOSAleier reeds 'n druk program het. Hy het ook terugvoering gegee aangaande die klub se finansies, wat ten spyte van uitdagings, gesond is. Kamfer het uitgestip dat die klub tans geen skuld het nie en dat hulle dankbaar is vir die borgskappe wat gedurende die jaar van sy voorsitterskap, bekom is.
Met die verkiesing van die nuwe bestuur, het gemoedere weer eens opgevlam en is daar aantygings gemaak dat lede en voornemende lede wat by die vergadering opgedaag het vir die AJV en verkiesing nie oor dieselfde kam geskeer is wat toegang betref nie.
Die vise-president van SWD Rugby, wat as waarnemer tydens die vergadering en ook as fasiliteerder van die bestuursverkiesing opgetree het, Ben Brinkhuis het sy hande vol gehad om die vergadering tot bedaring te bring. Hy het egter volgehou dat die debat oor lidmaatskap 'n "huishoudelike kwessie" is wat die klub sal moet bespreek en konsensus oor sal moet bereik voor die volgende bestuursverkiesing ten einde te verhoed dat dieselfde ongelukkigheid nie plaasvind nie.
Dawid Kamfer is herverkies tot voorsitter vir die volgende jaar, met Robin du Plessis as sy ondervoorsitter. Ander lede op wat op die bestuur sal dien sluit in: Edward Maart (tesourier); Angelo Erasmus (hulp-tesourier); Tania October (tesourier); Nimrod Karelse (hulp-tesourier); Addisionele lede - Duwayne Scholtz, Luwellyn Adams, Morné Kannemeyer, Elsabe Cameron en die klubkaptein is Garfield Olckers.