SA pluimbaltoernooi in Hartenbos
Die SA Woodroffetrofee-pluimbaltoernooi wat vanaf 20 tot 27 Oktober in die ATKV Skoffelskuur in Hartenbos plaasgevind het, het 80 mans- en 72 vrouespelers gelok.
Die toernooi het in twee afdelings plaasgevind, naamlik die SA Woodroffeafdeling (10 spanne, spanne bestaande uit ten minste drie mans en drie vroue) en die SA Stavridis-afdeling (12 spanne, spanne bestaande uit minstens drie mans en drie vroue) wat onderskeidelik ook in twee afdelings opgedeel is. Spelers van Kaapse Wynland, Eden, Suidelike Gauteng, Noord Gauteng SANW, SAPD, Westelike Provinsie en KwaZulu-Natal het aan die kompetisie deelgeneem. Spelers van Limpopo is ook in van die spanne opgeneem.
Die nommer een mansenkelspelers vir die twee afdelings Wessel Hartslief (Woodroffe) en Llewellyn Potgieter (Stavridis) is beide van Eden (George-klub), so ook die gemengde dubbels wenners Louwrens Schlebusch en Amanda Minnie (Woodroffe) en Llewyllyn Potgieter en Elodé Minnie (Stavridis) van beide afdelings.
Die Sportman van die SA Woodroffe én SA Stavridis is ook beide van Eden (Georgeklub).
Uit die toernooi is ses spelers vir die SA Woodroffe-span en ses spelers vir die SA Stavridis span gekies om einde April 2019 aan die Challenger Cup deel te neem. Ses van die 12 spelers is Eden-spelers, waarvan almal van die George-klub is, wat 'n groot prestasie is ten spyte van die feit dat die Georgeklub nie die nodige fasiliteite het om pluimbal op George te bevorder nie.