Neels Mostert (88) speel ‘n bars hou
Oktobermaand het ten einde geloop met die gewilde Sakemannedag wat op Woensdag, 31 Oktober weer die spelers lustig stokke geswaai het. Die wenners, Jurgens Bosman en Johann Strauss, het nie net die beterbal stablefordkompetisie op ‘n skitterende 51 punte gewen nie, maar ook hulle plek in die eindstryd van die Winteruitklop-kampioenskap verseker.
Die gedugte kombinasie van Dawid Gerber en Div de Villiers het alles gegee, maar selfs dit was nie genoeg om Johann en Jurgens te stuit nie.
Hulle kom nou in die finaal teen die kompeterende Ferdie Jonck en sy onvoorspelbare maat, Anton Steenkamp, te staan. Colin Buck en Chris Barnard wat deesdae weer gereeld prystafel toe stap, het op 47 punte tweede geëindig.
Die rustige Pine Pienaar en sy besoekersmaat, Andries Jacobs, se 46 punte het hulle in die derde plek laat eindig. Die volgende spelers het op 45 punte ook nog die paadjie prystafel toe bewandel: G Rule en J Smith, N Domingo en J Masie, S Morrison en A Lambrecht.
Saterdag
Saterdag, 3 November het die spelers reeds vroegoggend afgeslaan om te verseker dat hulle die rugbytoets tussen die Bokke en die Rose kon sien. Die 145 spelers het aan ‘n beterbal houespelkompetisie deelgeneem. Die stryd was fel met vyf pare wat op 61 houe geëindig het en die uittelstelsel het beslis dat Kelvin Muller en die 88-jarige Neels Mostert as wenners gekroon word.
Die volgende spelers het op 61 houe ook gesorg dat hulle ‘n vuurtjie kon gaan aanslaan: S Muller en K Louwrens, A du Plessis en J Masie, P Good en W Mitchell, asook G Gagiano en B Saayman.
Met die dae wat vinnig langer word is dit miskien tyd om die gholfstokke af te stof en voor donker nege putjies te geniet. Die baan is pragtig en sal beslis die dag se frustrasies en harde werk goed beloon.