Verf in kondome beskadig eiendom
Tieners van 'n hoërskool op Mosselbaai wat in 'n venynige vete met mekaar gewikkel is word verdink van die kwaadwillige saakbeskadiging waartydens drie eiendomme die afgelope naweek met verf in kondome beskadig is.
Die polisie ondersoek drie voorvalle op Fraaiuitsig, Hartenbos en Danabaai.
Volgens die Groot-Brakrivier polisiewoordvoerder, kst Laurianne Botha is daar tussen 10 November en 11 November op 'n woning in Fraaiuitsig toegeslaan.
Die verdagte/s het ligte groen, blou en wit verf in kondome gesit en dit onder meer teen die woning se mure gegooi. "Die skade beloop reeds meer as R100 000 omdat die klaer se blou Ford Ranger-bakkie ook met verf gegooi is."
Danabaai
'n Danabaaier se huis het op Woensdag, 7 November onder vrot eiers deurgeloop. Kort daarna, berig die KwaNonqabapolisie se woordvoerder, sers Kapp, was die huis ook die teiken van verfbomme.
"Die voorval kon enige tyd tussen 10 November en 11 November plaasgevind het. Toe die inwoner buite sy huis kom het hy die verfblertse op die plaveisel voor sy huis opgemerk. 'n Stukkende kondoom is ook op die toneel gevind," aldus sers Kapp.
Sersant Kapp sê die KwaNonqabapolisie ondersoek 'n saak van kwaadwillige saakbeskadiging. Enige persoon met inligting word versoek om die polisiestasie (044 606 5600) te kontak.
By navraag aan die Da Gamaskoppolisie, in wie se bedieningsarea Hartenbos is, het 'n woordvoerder gesê dat geen voorvalle van verfgooiery, soos beweer, op die buurtwaggroepe gerapporteer is nie.
Een van die klaers het aan die Mossel Bay Advertiser gesê die kwaadwillige optrede spruit na bewering uit konflik tussen 'n groep tienermeisies- en seuns. "Dit lyk vir my dit gaan oor 'n spesifieke persoon wat nie na 'n kamp toe genooi is nie. Ek verstaan net nie hoekom die ouers ook daaronder moet ly nie. Daar is 'n verdagte, maar ek is nie seker of dit wel hy is wat dit gedoen het nie."