Ek is tevrede, meen Diaz se uittredende hoof
Na 24 jaar as skoolhoof, is dit moeilik om jou die 2019-skooljaar in te dink sonder dat meneer Granville Briesies die leisels by Diaz Primêre Skool vat. Maar na 40 jaar in die onderwys, hoofsaaklik verbonde aan dié skool, volg hy kort op sy ewe bekende vrou, Chantal, voormalige skoolhoof van Hoërskool Sao Bras, wat in Oktober afgetree het, se hakke.
Eintlik, vertel hy, sou hulle in 2016 al uittree, maar vanweë die skool se bouprojek wat na sy jarelange insette nou uiteindelik einde se kant toe staan, het hy besluit om die projek eers deur te sien.
Nuwe gebou
Meneer Briesies het sedert 2002 gepoog om ‘n nuwe skoolgebou vir Diaz Primêr te verseker.
“Ek wou darem baie graag hê hierdie plankieskool moet oorgebou word met stene.” Dít alleen was ‘n groot mylpaal in sy lang loopbaan. “Gedagtig aan waar baie van onse kinders vandaan kom, is dit vir my belangrik dat die kinders na ‘n leeromgewing toe moet kan kom waar dit beter is. As dit hier mooi is, kan ‘n mens vir die kind ook oordra dat hy of sy kan droom van iets beters vir homof haarself. Vir my was dit ‘n geestesprojek. Ek is tevrede.”
Diaz Primêr het gedy onder mnr Briesies se leierskap. As die derde skoolhoof in die skool se bestaan, wat die onderwysstelsel vóór en ná demokrasie as leier te kon beleef, glo hy dat hy die goed en die sleg van beide stelsels ervaar het. Hy glo stabiliteit in die skool se topstruktuur, was behoudend.
“Kernwaardes by Diaz Primêr is selfbeheersing, selfrespek, selfdissipline, selftrots en dankbaarheid. Dit is deel van ons waarneembare kultuur by die skool. Sonder ‘n unieke kultuur en karakter is ‘n skool dood.”Hy sê dat hy besonder geseënd was met die kwaliteit van opvoeders op sy personeel. “Ek kan met trots sê dat die opvoeders hier in die beste belang van onse kinders optree. Niemand is hier vir julle eie onthalwe nie.”
Gemeenskapsleierskap
Bo en behalwe sy toewyding aan Diaz Primêr, het mnr Briesies sy merk in die gemeenskap gemaak. Hy was instrumenteel, as die jong voorsitter van die D’Almeidasportraad om in die tagtigerjare te onderhandel om die D’Almeida-stadion te help ontwikkel tot die fasiliteit wat vandag daar bestaan. Verder het hy hom beywer vir die oprig van ‘n binnenshusie sportsentrum wat vandag ‘n multi-funksionele doel dien in Uitbreiding 23. Hy was ook ‘n bestuurslid van die destydse Sportskool, wat suksesvol oorgedra is aan Hoërskool Punt onder die nuwe naam die Arthur Johnsonsportweek. Meneer Briesies is ook sedert die beginjare van die Sussex-krieketklub, betrokke by die bestuur en is later as erepresident verkies.
Van sy grootste nalatenskappe, is die stigting van die Mosselbaai-prinsipaleassosiasie. “Ek het baie besluite in my lewe geneem, waarvan hierdie een van die bestes was.”
In 2014, gedagtig aan die veranderinge en uitdagings van die onderwys, vat die gedagte pos om ‘n ruimte te skep waar skoolhoofde mekaar as klankbord kan gebruik. In 2015 is die Mosselbaai-prinsipaleassosiasie gestig. Die assosiasie dien ook as ‘n platform vanwaar gesamentlike kwessies met die onderwysdepartement opgeneem kan word. “Ons is ‘n diverse groep wat al soveel uit mekaar se ervaring geput het. Ek kan met oorgawe sê dat ons nie meer kollegas is nie, maar vriende geword het.” Van Wyk Dames, skoolhoof van Milkwood Primary neem nou die plek in die voorsitterstoel in.
Rustyd
Na al die jare in die onderwys en ook as gemeenskapsleier, wil hy nou tyd aan sy gesin teruggee. Hy en sy vrou, Chantal sien uit om te reis, gholf te speel en hy hou boonop van visvang. “Ek en sy sal nooit stilsit nie,” meen hy.