Mosselbaai se geskiedenis herleef
Staaltjies uit Mosselbaai en omgewing se geskiedenis is op DVD en in ‘n boek vasgelê.
Anroux Marais, Wes-Kaapse minister van kultuursake en sport het Maandag, 3 Desember Charles Theunissen se boek, Die kinders van Tarka en elders, bekendgestel. Die program was deel van die minister, die Wes-Kaapse Biblioteekdiens en die Mosselbaai-munisipaliteit se mondelinge geskiedenisinisiatief. As deel van die inisiatief is kopieë van die boek, DVD’s met onderhoude oor Mosselbaai se geskiedenis, geskiedenisplakkate, en bemarkingsmateriaal aan al die omliggende biblioteke en ander rolspelers oorhandig. Die boek kan nou uitgeneem word by ‘n biblioteek in jou omgewing. Dit is ook in boekwinkels beskikbaar waar meer as 400 kopieë reeds opgeraap is.
Minister Marais het aan die gaste gesê, “as enige persoon afsterwe gaan ‘n groot stuk geskiedenis daarmee heen.”
Sy het mense aangemoedig om deel te raak van die mondelinge geskiedenisinisiatief en sodoende die erfenis te help bewaar en daarop voort te bou.
Theunissen het tydens die boekbekendstelling gesê sy opvolgboek oor Mosselbaai se geskiedenis is reeds in ‘n gevorderde stadium.
Die boek sal veral fokus op die dorp se vissermanne wat die broodwinners in die ou dae was.
Foto: Christo Vermaak