Raadslede die kop gewas
Die uitvoerende burgemeester, raadsheer Harry Levendal het tydens die maandelikse munisipale raadsvergadering die raadslede van alle partye tot orde geroep. Hy het hom sterk uitgespreek oor kommentare op die jaarlikse burgemeesterstee wat, sedert hy die burgemeestersamp beklee, in die onderskeie wyke plaasvind.
“Ek het as kind arm grootgeword, ek was ‘n weeskind. Ek het van die gebruik van een groot burgemeesterstee afgewyk nadat ek opgelet het dat gewone mense in die gemeenskap nie die vervoer het om die jaarlikse byeenkoms in die stadsaal by te woon nie. As raadslede besef ons dalk nie wat dit vir die bejaardes beteken om deel te vorm van die verrigtinge nie. Dit is ‘n kalenderdag wat afgemerk word, waarna uitgesien word.”
Raadsheer Levendal sê hy het die wyksraadslede uitgenooi om die burgemeesterstee, wat deur sy kantoor befonds word, in hul onderskeie wyke aan te bied sodat meer inwoners daarby betrek kan word.
“Elke wyksraadslid het ingekoop om oor politieke grense heen iets vir hul gemeenskappe te doen. By elke geleentheid waar ek was, was die gaste meer as dankbaar.”
Die burgemeester het gesê getalle sal na afloop van die onderskeie wyke se byeenkomste toon dat meer mense by die afsonderlike funksies betrek word as wat die gesamentlike tee vantevore bygewoon het.
Hy het benadruk dat hy dit nie kan verstaan dat raadslede ‘n ander te na wil kom oor die hantering van die burgemeesterstee nie.
“As ‘n raadslid nie wil inkoop nie, sal daar vir daardie wyk nie ‘n burgemeesterstee aangebied word nie.”
Raadsheer Levendal het ook benadruk dat die uitvoerende onderburgemeester hom by geleentheid by die burgemeesterstee verteenwoordig het.