‘Brandbestryders verdien ons lof’
Tydens die pas afgelope maandelikse raadsvergadering van die Mosselbaaimunisipaliteit het die uitvoerende burgemeester, raadsheer Harry Levendal die brandbestryders verbonde aan die Mosselbaai brand- en rampbestuursdienste lof toegeswaai vir hul onselfsugtige opofferings tydens die brande wat die omgewing onlangs vir sowat ‘n maand lank geteister het.
“’n Mens is gou om kritiek te lewer, maar neem dikwels te lank om dank en erkentlikheid te gee waar dit verdien word.”
Gemeenskappe in die groter Mosselbaai is geraak in die maandlange brande wat in die Suid-Kaap 11 lewens geëis en meer as 100 000 hektaar en talle huise verwoes het. Honderde werksgeleenthede is daarmee saam daarmee heen.
“Mosselbaai se brandbestryders het oudergewoonte nie gehuiwer om selfs in George en ander areas hul hulp aan te bied en deurnag te stry teen die verswelgende brande nie.
“Mosselbaai se hoof van die brand- en rampbestuursdienste, Joseph Johnston, word allerweë erken as waarskynlik die besopgeleide en mees ervare brandweerhoof en het sy hulp en ondersteuning sonder skroom aangebied. Ek kan onomwonde sê Mosselbaai het die beste hoof van brandweerdienste in die omgewing, indien nie die provinsie nie.
“Dankie, brandbestryders dat julle jul roeping uitleef, dat julle nie skroom wanneer die klok lui om julle eie lewens in gevaar te stel om andere se lewens, eiendom en die natuur te red nie. Julle het honderde kere in jul loopbane al die gruwelikste tonele beleef, en ek versoek dat vir die brandbestryders van Mosselbaai behoorlik beradingsdienste gelewer sal word,” het die burgemeester gesê. Hy het die gemeenskap van Mosselbaai bedank vir die wyse waarop hulle met skenkings en donasies die brandweerdienste en brandbestryders ondersteun het.
“Dankie vir elke botteltjie water, elke broodjie en enige ander skenkings wat ruimhartig uitgedeel is.”
Die burgemeester het bygevoeg dat die Wes-Kaap se veldbrandseisoen amptelik eers op 1 Desember begin het, dog het plaaslike brandbestryders reeds meer as ‘n maand gewerk om ‘n reeks veldbrande in die omgewing te blus. Hy het ‘n beroep op inwoners gedoen om enige brande dadelik te rapporteer en nie te aanvaar dat dit reeds aangemeld is nie.
Ek kan onomwonde sê Mosselbaai het die beste hoof van brandweerdienste in die omgewing, indien nie die provinsie nie.