Donny Smith skitter op die gholfbaan in 2018
As daar nou ‘n Mosselbaai-lid is waarop almal trots kan wees, dan is dit beslis die 57-jarige Donny Smith. Hierde gewilde, vriendelike speler het die afgelope drie jaar die Mosselbaai senior-kampioenskappe oorheers.
n strawwe kompetisie het Donny vanjaar die senior Suid-Kaap geslote- sowel as die senior Suid-Kaap ope kampioenskappe gewen.
Hy was ook die wenner van die Plettenbergbaai senior ope, die Kingswood senior ope, asook die Stilbaai senior ope. Voorts was hy die naaswenner in die Mosselbaai senior ope, die Dolphin Trophy ope (St Francis Bay) en ‘n derde plek in die Oubaai senior ope, Knysna senior ope en die George senior ope.
Woensdag
Woensdag, 28 November het 176 spelers die tuinwerk opsy gestoot om aan die maandelikse sakemanne-borgdag deel te neem.
Die beterbal stablefordkompetisie het fel mededinging tot gevolg gehad, maar op 49 punte kon Hendrik Kriek en Heinrich Matthee net-net die knoop deurhak. Clinton Windvogel en Talvin Schultz was die naaswenners op 48 punte met Wynand Stander en Sieg Stander (46 punte) in die derde plek.
Die volgende spelers kon ook nog deel in die feestafel: A du Plessis en R Combrinck (45 punte), J van Rensburg en W Kotzé, asook A van Wyk en S le Roux, albei pare op 44 punte. Hartlike dank aan al die betrokke sakemanne wat van hierdie dag so ‘n reusesukses maak.
Saterdag
Twee van ons "swaeltjielede", John en Michaela Collins van Engeland, het Saterdag, 1 Desember hulle vlugflouheid afgeskud en op 61 houe was hulle die wenners van die beterbal houespelkompetisie. Die gedugte kombinasie van Jan Joubert en Gerrit van Zyl het 62 houe aangeteken wat aan hulle die tweede plek besorg het. Die alom bekende, beminde, talentvolle, vreesaanjaende Gert Pieterse het sy beskrywing gestand gedoen en op 63 houe was hy en Rouxwy van Wyk in die derde plek. Gert bied eerskomende naweek ‘n gholfkliniek vir gevorderde spelers aan waar hy hoofsaaklik aandag sal gee aan die emosies wat spelers ervaar wat sukkel. Voormalige kaptein en president van die klub, Chris Murray, het saam met André van der Merwe ook 63 houe aangeteken en sodoende die vierde plek ingeneem. Adin van Aswegen en Eugene Duthie se 64 houe het hulle ook verseker van ‘n heerlike braaipak.