Verdagte wat 80-jarige aanval pas uit tronk
Twee mans, Dwyne Modien (18) en Shane Alexander (20) het gister, Donderdag, 6 Desember in die Mosselbaai-landdroshof verskyn op 'n aanklag van huisroof, slegs vier dae nadat 'n 80-jarige inwoner van die Santos Haven-aftreeoord in haar woning aangeval en beroof is. Die Mossel Bay Advertiser het betroubaar verneem dat een van die verdagtes 'n week vantevore, op Donderdag, 29 November op parool vrygelaat is.
Die slagoffer het om 05:30 op Sondag, 2 Desember wakker geword en die verdagtes in haar huis aangetref.
Hulle was reeds besig om goedere bymekaar te maak om te steel. Sy is met die vuis in die gesig geslaan en met 'n mes gedreig voordat die verdagtes onder meer met drie selfone en 'n iPad op die vlug geslaan het. Die slagoffer, wat se hande vasgebind is, het ook kneusplekke op haar bors en moes na die voorval ongeveer 300m kaalvoet na die siekeboeg stap waar sy hulp gekry het. Sy is vir waarneming na 'n plaaslike hospitaal geneem en is intussen weer ontslaan. Haar dogter ondersteun haar tuis.
Inwoners geskok
Inwoners van die aftreeoord het die afgelope week hul skok oor die voorval uitgespreek. Ironies genoeg het die oordbestuurder, Steven de Kock twee dae voor die aanval met inwoners oor hul sekuriteitsmaatreëls vergader.
‘Ons is regtig tevrede met hoe die saak hanteer is.’
'n Inwoner wat voorheen bure van die slagoffer was, Louis van Zyl (86) het tydens die Mossel Bay Advertiser se besoek aan die oord gesê hulle het nooit gedink so iets sal daar gebeur nie. "Maar nou is ons weer paraat. Nou besef ons, dit kan met ons ook gebeur." Nog 'n inwoner, Grace Marx (88) woon etlike jare in Santos Haven en sê hulle is diep geskok oor die voorval, en veral die gewelddadigheid wat daarmee gepaard gegaan het. De Kock sê hierdie is die tweede voorval in die 17 jaar wat hy die aftreeoord bestuur. Die vorige voorval was agt maande gelede by 'n huis waar die inwoners nie tuis was nie en 'n selfoon is gesteel. Die verdagtes het tydens die voorval met 'n voertuig by die aftreeoord ingery onder die valse voorwendsel dat hulle vir die departement van maatskaplike ontwikkeling werk. Hulle het by die woning ingebreek en die selfoon gesteel waarna hulle weer uitgery het.
Sedert Sondag se voorval het verskeie inwoners in die aftreeoord hul sekuriteit tuis opgeskerp.
Sagte teikens
Die vermoede bestaan dat die twee mans Sondag toegang tot die oord verkry het deur in 'n boom langs die heining te klim en oor te spring. Die slagoffer se huis is 'n paar meter van waar die heining is. Haar sitkamervenster was toe maar nie gesluit nie en het oor geen diefwering beskik nie. Dít is ook hoe die verdagtes toegang tot die woning verkry het. De Kock sê aftreeoorde is sagte teikens. “Die waarheid is, dat Mosselbaai geweldmisdade nie gaan vryspring nie. Ons is omhein met pallisades en het slegs een ingang wat 24-uur per dag deur 'n sekuriteitswag gekontrolleer word. Ons het ook twee sekuriteitswagte wat saans die gebied patrolleer. Die aftreeoord is egter 7.9 hektaar groot en hier is 208 wonings met drie sentrums en 360 inwoners. Mense moet dus besef, dit is 'n groot gebied. Stééds bly die insident vir ons skokkend." De Kock sê hulle is tans in die proses om kameras toegerus met die jongste tegnologie in die oord te installeer. Boonop is nog ekstra sekuriteitsmaatreëls in plek gestel.
Arrestasie
Die ondersoekbeamptes, sersante Ntombizanele Majola en Andrew Salemane onder leiding van Mosselbaai-speurhoof, kapt Jackie Grundlingh het sedert die voorval leidrade opgevolg en onder meer die slagoffer se gesteelde selfoon opgespoor. Op Dinsdag, 4 Desember het hulle om 04:30 by 'n huis in Aslapark toegeslaan en die verdagtes in hegtenis geneem.
Die slagoffer se dogter sê hulle het goeie ondersteuning van die polisie gekry. "Ons is regtig tevrede met hoe die saak hanteer is."
Mosselbaai-polisiestasie se bevelvoerder, lt kol Albert Haggard sê sy ondersoekbeamptes het hard gewerk. "Inwoners van Mosselbaai moet hulle sekuriteit opskerp en sorg dat hul deure en vensters gesluit word. Misdaad is ook op Mosselbaai."