Kruis sprei sy lig reeds 30 jaar
Vandag, presies 30 jaar gelede op Vrydag, 7 Desember het die Diaskruis vir die eerste keer die naglug bo Mosselbaai verhelder. Sedertdien is dit 'n gegewe van Mosselbaai, 'n kenmerk waarmee Mosselbaaiers vereenselwig sonder om tweekeer te dink.
Weinig weet egter dat die kruis nie 'n kerklike verwysing het nie en daarom juis oor alle kultuurgrense heen Mosselbaaiers verenig in die ware gees van die moderne Diasfees met die slagspreuk; waar kulture ontmoet.
Die kruis is tekenend van die ontdekkingsreise van Bartolomeu Dias, wat by Mosselbaai voet aan wal gesit het op Vrydag, 3 Februarie 1488.
Die voormalige munisipale elektriese ingenieur, Ockert Bothma was die dryfkrag vir die kruis wat sy beslag gekry het met die eerste Diasfees in 1988. Dit is opgerig op rotse naby die Mosselbaai-vuurtoring en, hoewel 'n gloeilamp of twee met die jare verdof het en vervang is, skyn die kruis se lig steeds helder.
Die idee om 'n kruis op te rig, word aan Doepie van Zyl toegedig. Hy het die kruis baseer op 'n kruis in sy dorp van oorsprong, Postmasburg.
Alwyn Huisamen vertel dat die aanvanklike kruis klein gloeilampies gehad het en dat Andries van der Berg met die idee vorendag gekom het om 'n pyp vas te sement in die rotskeur waarin die houtkruis vandag steeds rus. Gevolglik sal die kruis se houtstruktuur, wat sowat 30 jaar die elemente kan weerstaan, vervang kan word indien nodig.
Meer onlangs het Kobus Barnard die kruis heeltemal oorgedoen en die klein gloeilampies met buisligte vervang. Die lig skakel met 'n outomatiese sensor aan sodra dit donker word om steeds, na 30 jaar, 'n bekende en geliefde baken vir die omgewing te wees.