Genadegawe met oop hande uitgedeel

"Dis genadegawes, elke bietjie hulp vir ons diere is net genade," sê een van die begunstigdes wat sal deel in 'n vrag veevoer wat bestem is vir diere van landbouers in die groter Mosselbaai-area. Boereverenigings van die Bredasdorp-omgewing het 12 vragmotors opgehoop met droogtehulp vir landbouers in die groter Mosselbaai geskenk. Dit het ook gars, mielies en veelekke ingesluit. Van vroeg reeds op Dinsdag, 4 Desember het Mosselbaaiers die vragmotors, wat by Transand byeengekom het, ingewag. Toe die eerste vragmotor met sy vrag by die hekke indraai, het die bekommerde stroefheid vir breë glimlagte plek gemaak.

"Ek koop al maande nie meer veevoer nie," het 'n bekommerde landbouer aan die Mossel Bay Advertiser gesê. Kuddes is reeds tot net die allernodigste uitgedun en landbouskuld hoop op. "Ons het honderde milimeter reën nodig om die droogte te breek, om die ondergrondse waterbronne aan te vul en water in die damme te kry."

Sommige van die vragmotors het hul vragte veevoer op Herbertsdale afgelewer. In Mosselbaai is die vragte afgelaai en is die mees hulpbehoewende boere voorkeur gegee. Selfs die vervoer is gratis deur die georganiseerde landbou bewillig en onder aanvoering van Lafras Venter het die 12 vragmotors in konvooi die skenkings afgelewer.

"Dis moeilik om dankie te sê. Hoe sê 'n mens dankie aan jou kollegas wat verstaan, wat waarskynlik hulself tekort skiet sodat hulle met oop hande dit wat so broodnodig is, aan andere kan uitdeel?"

Sommige van die begunstigdes van die groter Mosselbaai saam met die span wat vir die vervoer van die voerskenking vanuit die Bredasdorp-omgewing verantwoordelik was.

Altesaam 12 vragmotors veevoer, wat ook gars, mielies en veelekke ingesluit het, is met groot dankbaarheid op Dinsdag, 4 Desember vanuit die Bredasdorp-omgewing in Mosselbaai ontvang.