Wetstoepassing verskerp in seisoen
Met die aanvang van die somervakansie het wetstoepassers hul sigbaarheid by bekende misdaadknelpunte verhoog en die onderneming gegee dat operasies toenemend areas sal teiken waar misdadigheid gereeld voorkom.
Tegelyk word ‘n beroep op inwoners en vakansiegangers gedoen om waaksaam te wees en hul eie en hul familie se veiligheid voorop te stel, ook wanneer hulle ontspan, selfs by bekende strande en ander fasiliteite.
Wanneer vakansiegangers ontspan, is misdadigers juis op opportunistiese geleenthede ingestel.
Met die gesamentlike wetstoepassingsaksie vroeg Donderdagoggend, 6 Desember, het polisielede en munisipale wetstoepassers die spoorlyn en Diasstrand te voet gefynkam.
Verdagte persone is voorgekeer en waardevolle wenke is aan strandgangers meegedeel.
‘n Beroep word op vakansiegangers gedoen om nie waardevolle artikels saam met hulle strand toe te neem nie en om nie alleen op afgeleë strande of staproetes te gaan stap nie.
Ook in winkelsentrums moet gelet word op veiligheid en inkopies, beursies en selfone moet nie opsigtelik in geparkeerde voertuie gelaat word nie.
Net soos deur die loop van die jaar, moet alarms tuis en in geparkeerde voertuie geaktiveer, veiligheidsdeure gesluit en voertuie verkieslik binne erwe of motorhuise geparkeer word.