Wees bedag op veiligheid op strande
Inwoners en vakansiegangers word gewaarsku om op hul eie veiligheid bedag te wees op veral Diasstrand, asook ook ander strande in die groter Mosselbaai.
Hoewel misdaadknelpunte bedags deeglik gepatrolleer word, is dit veral vroeg soggens en teen skemeraand wat opportuniste strandgangers teiken.
By Diasstrand is die bosse tussen die see en Louis Fourieweg 'n gerieflike wegkruipplek vir misdadigers. Dit is veral maklik vir misdadigers om ongesiens toe te slaan en weer in die bosse te verdwyn.
Blue Waters
Daar is wel inisiatiewe deur die Mosselbaai-munisipaliteit om van vandag af soggens heelwat vroeër met strandpatrollies te begin en tot heelwat later saans daarmee vol te hou in die Blue Waters-area. Die strandwagte by Blue Waters sal daagliks van 06:00 tot 18:00 aan diens wees.
By ander strande sal buurtwaglede en polisiebeamptes by patrollies betrokke wees.
Dit bly egter strandgangers se verantwoordelikheid om hul eie veiligheid voorop te stel en dus liefs nie alleen nie en op afgesonderde strande hul waaksaamheid te verslap nie.
Die Wes-Kaapse regering se departement van ekonomiese ontwikkeling en toerisme (DEDAT) het 'n toerismeveiligheidsprojek van stapel gestuur en nooi toeriste in die Tuinroete en Karoo om, indien nodig die veiligheidsbeampte, Ilze Jacobs (082 972 2507) vir hulp en bystand te kontak vir praktiese en emosionele ondersteuning, onder meer om kontak met konsulate of ambassades of hul families te bewerkstellig. Die DEDAT-toerismebestuurders kan help om diegene wat traumaberading benodig, met die nodige hulpbronne te verbind.