Besware oor voorgenome ‘zipline’ te berde gebring
Die Mosselbaai-munisipaliteit se voorneme om 'n zipline by die gewilde Punt-area van Mosselbaai toe te laat, het sommige inwoners warm onder die kraag. Een inwoner, wat homself beskryf as 'n persoon met persoonlike belang by die voorgenome ontwikkeling, het talle pertinente besware oor die voorneme geopper.
Hy noem onder meer:
1) Dit blyk uit Section A (en Annexure A wat van die publiek weerhou word) dat die Mosselbaai-munisipaliteit reeds die tender (vir die bedryf van die zipline) toegeken het, maar met ‘n ondemokratiese en publiekvermydende openbare konsultasieproses. 2) Die aansoek in Section A beslaan slegs sowat 200 woorde wat slegs handel oor die erf waarop die vertrekpunt van zipline gebou gaan word. Wat van die aankomplek van die zipline-projek?
3) Geen onafhanklike kundigheidsverslag is aangeheg nie.
4) Geen melding word gemaak wat die ontwikkelaar se kundigheid, ervaring en volhoubaarheid is nie.
5) Geen melding van die volgende nie: besigheidsplan, implementeringsplan, geen tekeninge/sketse van die wegspring- of landingsplatforms nie, geen geotegniese impakanalise nie, geen uitleg van die infrastruktuur rondom die wegspring- en landingsplatform nie, geen personeelen opleidingsplan nie, geen melding van veiligheidsprotokol nie, en geen gebeurlikheidbeplanning nie.
6) Die ontwikkelaar sê dat in sy "considered opinion" 'n omgewingsimpakstudie nie nodig is nie. a. Op grond van watter gesag word hierdie verstommende uitspraak gelewer? b. Wat van die ruimtelike impak? Op die St Blaize-wandelroete, St Blaize-bewarea, die ikoniese swemplek by die punt bekend as “die sloep”, die ikoniese uitkykpunte op die branderwerking aan die ooste kant, die ikoniese uitsig op die grotte en die pragtige rotsformasies? c. Wat van menslike veiligheid reg bokant die loodregte kranse en die verraderlike see daaronder? Direkte en indirekte menslike toestroming langs die sowat twee kilometer sektor van die St Blaize-wandelroete, op die ruwe rotse, by die aankomsplatform, en die heersende ooste- of suid-oostewinde nie (ja, jy zip reg teen die wind in!) d. Wat van die geval van ‘n seeredding wat helikopter ondersteuning benodig? Wie neem verantwoordelikheid en wie is aanspreeklik? Gaan daar finansiële waarborge vooraf gegee word? Derde party eise? e. Wat van die audio-, visuele- en rommelbesoedeling rondom en ook tussen die vertrek- en die aankomsplatforms? f. Wat van die enorme betonwerke wat benodig gaan word om die aankoms/ vertrekplatforms tussen die ruwe rotse te bou en vir menslike gebruik te beveilig? 7) Volhoubaarheid: Wie gaan die zipline onderhou? Uiteindelik verwyder? Watter waarborge? Wat is die gebeurlikheid in die geval waar die ontwikkelaar verdwyn? (soos dit met “pop-ups” gebeur!) 8) Toerisme-ekonomie: Elke redelike Mosselbaaier sal saamstem dat dit belangrik is om ons dorp se ekonomie volhoubaar uit te bou en om werksgeleenthede te skep. Maar tot watter prys? Moet van die volgende toerisme juwele vernietig word: a. Die Punt se ikoniese uitkykpunte, swemplek en speelplek vir kindertjies. b. Die openbare ontspanningsarea aan die seekant en reg voor The Point Hotel. c. Marinetoerisme soos walvis kyk, besigtigingstoere met ‘n helikopter, lugsweef, natuurfotografie, en dies meer. d. Die St Blaize-bewarea en wandelroete? Kommentaar:
Die munisipale direkteur van beplanning en geïntegreerde dienste, Carel Venter reageer: "Hierdie kommentaar is deel van ‘n amptelike grondgebruikaansoek deur die applikant in terme van die Spatial Planning Land Use Management Act en die munisipale beplanningsbywet. Die aansoeker sal van alle kommentare ontvang voorsien word om op te reageer/kommentaar te lewer, soos deur die wet voorgeskryf. Dit sal dan in ag geneem word met die evaluering van die aansoek."