Goedgelowige pasiënt ingeloop
'n Verswakte bejaarde wat onlangs gehospitaliseer is, is 'n paar duisend rand armer nadat sy goedgelowig haar bankkaart en PIN-nommer aan 'n hospitaalwerknemer toevertrou het.
Na bewering het 'n vriendskap en vertrouensverhouding tydens hospitalisasie tussen die bejaarde en werknemer van die hospitaal ontstaan. Die bejaarde was onder die indruk dat die werknemer haar werk by die Life Bay View-hospitaal sou bedank om die bejaarde tuis te versorg. Hierdie voorneme het die werknemer ook teenoor vriende van die bejaarde geopper. Dit het later geblyk dat die werknemer, wat 'n vaste aanstelling by die hospitaal het, nooit bedank het nie.
In goedertrou het die verswakte bejaarde die werknemer skynbaar dermate vertrou dat sy haar versoek het om kontant by die OTM te onttrek. Die werknemer het toe volgens inligting meer as die ooreengekome bedrag onttrek.
Vriende van die bejaarde het agterdogtig geraak toe hulle van die onttrekking verneem, veral toe dit boonop blyk dat die bank se SMS-kennisgewing van die transaksie van die bejaarde se selfoon verwyder is. Die onttrekking reflekteer egter wel op die bejaarde se bankstaat wat die vriende op versoek bekom het.
Die bejaarde se vriende het by die werknemer en hospitaal oor die transaksie navrae gedoen. Die werknemer het na bewering erken dat sy die geld onttrek het en het blykbaar die versekering gegee dat die volle bedrag aan die bejaarde terugbetaal sal word.
'n Plaaslike prokureur is egter later betrek toe die geld teen die ooreengekome sperdatum steeds nie oorbetaal is nie. Na wat verneem word, het die prokureur gewaarsku dat strafregtelike stappe sal volg indien die geld om 13:00 vandag, Vrydag 14 Desember nie oorbetaal is nie.
Die hospitaalbestuurder, Lida Swart, het die voorval bevestig.
"Dit is nie algemene praktyk vir werknemers om pasiënte te help met persoonlike sake van hierdie aard nie. Die voorval word in 'n ernstige lig gesien en daarom is 'n interne ondersoek en menslike hulpbronne-dissiplinêre proses tans aan die gang," aldus Swart.