Seuns voltooi onvergeetlike staptog
Die pas waarteen die 21 jong manne wat Saterdag die 42ste Grosvenoravontuurstaptog voltooi het, in gelid by die Hartenbos Seefront aangekom het, was 'n getuigskrif van 'n verskeidenheid faktore. Dalk was dit die versugting na 'n lekker koppie koffie met beskuit. Of die uitsien na die gemak van 'n bed of die begeerte om net weer skoon te kom onder 'n warm stort. Maar een ding is seker, te oordeel aan hulle kommentaar na die sewedaglange staptog, dat dit 'n lewensveranderende ervaring was.
Die seuns, almal tussen 16 en 18 jaar oud, het op 1 Desember weggespring op Wildernis. Die Grosvenor-avontuurstaptog is geskoei op die geskiedkundige gebeure toe skipbreukelinge in 1782 vanaf die Transkeise kus na Kaapstad se Fort van Goeie Hoop gestap het.
Kosie Gericke, ervare instrukteur wat die staptog vanjaar vir die 18de keer meegemaak het, verduidelik die uitdagings.
"Ons het al by die Kaaimansrivierbrug gesukkel toe dele van die brug waarmee ons die rivier moet oorsteek, lekker geroes was." Daar word kuslangs gestap na Ballotsbaai, waarna 'n klomp steiltes met meer as 200 trappies getrotseer moet word en deurgaans strandlangs gehou soos die groep hulle pad vind terug na Mosselbaai. Die reënweer verlede week het sake bemoeilik, maar dit het die jonges geleentheid gegee om verdere vindingryke planne te maak om 'n droë skuiling te bewerkstellig.
"Honger, nat, koud, maar dit was lekker," het 'n deelnemer van Rustenburg gesê. 'n Ander outjie het weer gebieg dat die slaap op ongemaklike terrein, moeilik was.
"Ek het geleer om meer volwasse op te tree en dat as jy alleen gaan, gaan jy vinniger, maar sáám, gaan jy verder," het 'n outjie van Uitenhage beken. Volgens Gericke, was die groep vanjaar 'n sterk groep. "Die seuns het goeie karakter gewys en dit is juis die doelwit van die kamp, om karakter te bou. En dan het die aspek ook sterk uitgekom dat jy niks sonder God kan doen nie. Hierdie is nie 'n kerkkamp nie, maar deur die swaarkry en min kos, het dit sterk deurgekom. "
'n Ander deelnemer van Uitenhage kon nie uitgepraat raak oor hóé lekker die staptog was nie. "Ek het my gate uit geniet. Ek dink nie daar is nog so 'n kamp in SuidAfrika nie. Dit was vrék lekker gewees. Volgende jaar kom ek weer, ek belowe."
Jose Baruch, 'n plaaslike paramedikus, het vir die derde keer die staptog voltooi. "Ek sê elke jaar ek kom nie weer terug nie, maar daar is iets wat jou terugbring. Die spangees, die mense. En dat dit jou nader aan die Here bring. Dít is wat jou terugbring." Ewald Crause, stigter van die Grosvenoravontuurstaptog, het die jonges by die eindpunt verwelkom. Hy het ook by die wegspring verduidelik waaroor alles nou eintlik gaan. By die eindpunt het die jonges hulle prys ontvang - 'n Grosvenor T-hemp. Hierdie voorreg is maar 'n handjievol seuns beskore wat jaarliks sedert 1976 hierdie lewensveranderende avontuur meemaak.