Munisipale direktoraat vier suksesvolle jaar

Bestuurslede van die Mosselbaaimunisipaliteit se direktoraat korporatiewe dienste het onlangs tydens 'n jaarafsluitingsfunksie die suksesse van die afgelope jaar in oënskou geneem.

Enkele van die hoogtepunte waarop hierdie afdeling kan roem, is die prestasie in praktykdokumentbestuur, waar Mosselbaai as beste in die Wes-Kaap gereken word. Ander hoogtepunte sluit in gesonde arbeidsverhoudinge, die implementering van beste praktykmaatreëls vir plaaslike ekonomiese ontwikkeling en die stukrag agter klein, medium, en makro ondernemings. Die direktoraat word ook gereken as die voorloper in plaaslike regering vir maatskaplike ekonomiese ontwikkeling. Hierbenewens is die totale herstrukturering van munisipale organogram ook deur personeel van hierdie direktoraat met groot sukses vanjaar afgehandel.

Tydens die jaarafsluiting het die direkteur van korporatiewe dienste, Edward Jantjies, erkenning gegee aan die onderskeie bestuurshoofde van die direktoraat vir hul toegewyde diens die afgelope jaar.

Die bestuurslui van die direktoraat van korporatiewe dienste van die Mosselbaai-munisipaliteit het die suksesse van die afgelope jaar onlangs in oënskou geneem. Direkteur Edward Jantjies (derde van regs) het ook die uitdagings van die komende jaar met die onderskeie bestuurders deurgetrap.