Mosselbaai se versteekte paradys
Die bekende Twee Kuilen-ontwikkeling in Mosselbaai vier vanjaar sy 20ste bestaansjaar en die geleentheid is onlangs tydens ‘n gesellige ete gevier.
Volgens ou foto's wat ontvang is, het Twee Kuilen die afgelope 20 jaar ‘n algehele gedaanteverwisseling ondergaan. Aanvanklik was daar net sand en geen bome nie behalwe vir ‘n paar Port Jackson-bosse. Vandag is daar pragtige tuine en groot bome en die inwoners beweer trots dat hulle “kamp” die boomrykste in Mosselbaai is.
Daar is baie interessante vertellings aangaande insidente wat oor die jare in Twee Kuilen afgespeel het.
Gerrie en Helene van
Jaarsveld was in groot moeilikheid toe hulle ‘n stootskraper gehuur het om ‘n sandduin te verskuif sodat hulle die see kon sien. Die vrou van die destydse Fauna en Flora, wou hulle net hof toe vat, maar die kwessie is gelukkig vreedsaam opgelos en vandag spog die Van Jaarsvelds met ‘n see-uitsig. Hul eenvertrekhuisie wat hulle in 1998 laat bou het, is vandag ‘n pragtige vierslaapkamerwoning.
Wouter en Andra
Oosthuizen se dogter Paula, is in 2002 op die perseel getroud en die onthaal is deur Denise van der Walt, ook ‘n inwoner, hanteer. In 2010 het Wikkie Vermeulen ‘n kastrol olie op die stoof aan vergeet en het Twee Kuilen ook sy eerste “brand” gehad. Die vuur is egter vinnig geblus en die skade was minimaal behalwe vir die trauma wat deur al die inwoners ervaar is.
Groot voorreg
Wat opgeval het tydens die geselligheid is dat almal gepraat het oor die groot voorreg om in Twee Kuilen te kan woon. Woorde soos lekker, pragtig en feestelik is gereeld gehoor. Die inwoners praat ook met liefde van hulle “kamp”. Geen wonder dan ook dat daar nie net mense hier woon nie. Tarre is ‘n tarentaalmannetjie wat al die afgelope vyf jaar ook ‘n “inwoner” is en hy het al menige klein tarentaaltjies help groot maak. Daar word gereeld ‘n bosbokkie gesien en muishonde is geen vreemde gesig nie. Wanneer die inwoners eers oor “hulle” skilpaaie begin praat, verhelder die gesigte dadelik.
Die ryk voëllewe is natuurlik ook wyd bekend en daar is al meer as 50 voëlspesies hier aangeteken. Straatname soos Blouvalk en Bleshoender vereer dan ook die ryk voëllewe.
Die oorspronklike beplanning was eintlik dat Twee Kuilen ‘n marinaontwikkeling sou wees met waterweë tussen die huisies, maar die kompleks is uiteindelik nooit so ontwikkel nie. Vandag geniet die inwoners egter die boomryke strate waar hulle in veiligheid kan stap en die wandelpad na die klein strandmeer, is vir baie ‘n daaglikse uitstappie.
Knus halfpad tusssen Mosselbaai en Hartenbos geleë, is inkopiesentrums ook maklik bereikbaar. Die 230 eenhede wat 20 jaar gelede as eenvertrek, badkamer en kombuis gekoop is vir R69 000 se waarde en groottes het in sommige gevalle vervierdubbel en daar is onlangs eenhede vir R2.2 miljoen verkoop.
Doons en Melanie Botha is reeds die afgelope vyf jaar die oordbestuurders en dit is duidelik dat daar baie omgee en samewerking onder die inwoners is en almal is dit eens dat Twee Kuilen Mosselbaai se eie versteekte paradys is.