2018 spreek van baie hoogtepunte en uitdagings
Met skaars 10 dae tot 2019, het Mosselbaai-munisipaliteit se munisipale bestuurder, adv Thys Giliomee die uitdagings vir die nuwe jaar en die afgelope jaar se hoogtepunte en uitdagings in oënskou geneem.
"2019 sal talle uitdagings bring: Politieke onstabiliteit kan weens die provinsiale en nasionale verkiesing verwag word. Die Mosselbaai-munisipaliteit sal egter volhard met ons uiters hoë standaard van dienslewering. Hiervoor sal alle personeel se posbeskrywings hersien en alle poste herevalueer word, alle delegasies sal hersien word en die register van delegasies sal aangepas word. Die werkstudieondersoek na die koste-vandienslewering sal voltooi word en die tariefstruktuur en basis vir tariewe sal ooreenkomstig aangepas word," aldus adv Giliomee.
Dit is enkele van die uitdagings wat voorlê, maar is tekenend van die toekomsgerigtheid wat Mosselbaai-munisipaliteit in 2018 die erkenning as beste plaaslike owerheid in die land besorg het.
Top gradering
"In 2018 verwerf die munisipaliteit nie net die sesde opeenvolgende skoon oudit nie, maar om deur Ratings Afrika aangewys te word as die mees finansieelvolhoubare munisipaliteit in Suid-Afrika was 'n besondere hoogtepunt. Mosselbaai en Swartland-munisipaliteit deel die eerste plek met elk 84 uit 'n moontlike 100 punte," sê adv Giliomee.
Suksesse
Giliomee sê dit is nie net die munisipaliteit nie, maar ook gemeenskapsorganisasies wat vir hoogtepunte gesorg het. Hy noem spesifiek die Mosselbaai Gemeenskapspolisieëringsforum (GPF) wat as die beste in die land aangewys is en bedank die voorsitter, Leon van Dyk en buurtwaglede en GPF-lede vir hul opofferinge om misdaad te bekamp.
Isaac Ntoto van Eden Berries in Brandwag, wat aangewys is as wenner van die 2018 Prestige Agri Award en Danica Barnard wat met twee gesogte skoonheidstitels spog, verdien spesiale vermelding.
Strategiese rigting
Die munisipaliteit se 2018 strategiese sessie het twee belangrike uitkomste opgelewer; om programme aktief te loods gemik om gemeenskappe se morele en sosiale heropbou te fasiliteer en om te fokus op die skep van ekonomiese geleenthede in ‘n veilige omgewing vir die skep van volhoubare werksgeleenthede.
Hy verwys na drie suksesvolle Indabas en sê seevisboerdery, vaardigheidsontwikkeling en energie is belangrike fokusareas met die omgewingsimpakondersoek na seevisboerdery wat volgende jaar geloods word, asook die konsepnota vir ‘n moontlike spesiale ekonomiese sone (SEZ) in Mosselbaai wat vroeg in 2019 weer aan die Provinsiale Regering voorgelê sal word vir hulle ondersteuning.
Behuising
Benewens misdadigheid en die hantering van rommel is behuising een van die grootste uitdagings. Die titelaktes vir die 154 huise van die Herbertsdale Behuisingsprojek wat vanjaar voltooi is, is oorhandig.
Die ontwikkelingsplan vir die Mountain View-ontwikkeling van ongeveer
1 200 eenhede in ‘n geïntegreerde behuisingsontwikkeling is voltooi en aanvaar.
Die eerste van die ontwikkelings waar middelinkomste integrasie deel vorm van die voorwaardes vir vervreemding van munisipale eiendom is in 2018 goedgekeur op erf 3991, Diasstrand. Die beplanning vir die opgradering van ongeveer 4 500 informele stukture, deur hulle op gedienste erwe te hervestig, nader voltooiing.
"Nie alle projekte is met dieselfde sukses afgehandel nie," sê adv Giliomee. "Die behuisingsontwikkeling aangrensend aan Walvisstraat vorder nie soos beplan nie.
In 2018 is ‘n nuwe kontrakteur aangestel om die dienste te installeer nadat die aanvanklike kontrakteur nie sy verpligtinge nagekom het nie en sy kontrak gekanselleer moes word.
Die tender vir die oprigting van die topstrukture vir die ontwikkeling moes in 2018 gekanselleer word weens ‘n verandering in spesifikasies. Ten einde aan nasionale wetgewing te voldoen sal die tender aangepas word en vroeg in 2019 heradverteer word."
Hy noem dat die Ruimtelike Beplanningsraamwerk vanjaar hersien en opgedateer is. Spesifieke ontwikkelingsraamwerke is aanvaar, onder meer vir Aalwyndal en die area net buite Hartenbos.
Suksesvolle dorpsfeeste soos die Diasfees, Sportfees en Soulfest het talle toeriste gelok. Die jaarlikse Buffalo Rally en Moss Jazz Fees geniet munisipale ondersteuning soos wat versoek en goedgekeur word. ‘n Baie suksesvolle Ministers-Burgemeestersforum is ook in Mosselbaai aangebied.
"Rommelstorting bly ‘n groot uitdaging. Die tender vir die dorp se skoonmaak is hersien. Die nuwe kontrakteurs, wat vanaf 1 Julie diens doen, vaar goed. Ons kry gereelde, positiewe terugvoer oor die netheid van die dorp.
Die munisipaliteit het ook die afvalbestuurplan hersien en die gewysigde plan in 2018 aanvaar om in 2019 te implementeer. Tuinroete Distriksmunisipaliteit het in 2018 die publieke-private vennootskap-tender vir die ontwikkeling en die bedryf van die streekstortingsterrein suksesvol toegeken. Ontwikkeling behoort in die eerste helfte van 2019 te begin," aldus
Giliomee.
Dankie Feeste Rommel
"Ek kan die Mosselbaaiers nie genoeg bedank vir die positiewe gesindheid teenoor die munisipalteit nie. Baie dankie vir die baie goeie betaaltendens wat ons beleef. Baie dankie vir die onbaatsugtige bydraes in sowel tyd en opoffering vir brandweerdienste en buurtwagwerk, opheffingswerk en vele ander," benadruk adv Giliomee.
Lees die volledige berig aanlyn by mosselbayadvertiser. com
Nie alle projekte is met dieselfde sukses afgehandel nie