Dienste gemonitor
Wat Mosselbaai waarskynlik van baie ander dorpe in die Wes-Kaap onderskei, is die nougesette klem op uitstekende dienslewering.
Tydens die somervakansie kom verteenwoordigers van al die onderskeie dienste-organisasies elke oggend om 08:00 onder leiding van Joubert Coetzee, 'n senior bestuurder van die Mosselbaai-munisipaliteit byeen om diensleweringsprobleme te identifiseer en te verseker dat dit onmiddellik aandag geniet.
Die seisoenmoniteringskomitee is die voortsetting van 'n munisipale dienstekomitee wat deur die loop van die jaar elke Vrydag vergader.
Daagliks lewer verteenwoordigers van die munisipaliteit, toerisme-instansies, Mosselbaai Toerisme, die Tuinroete Distriksmunisipaliteit, kontrakteurs, die SA Polisie, provinsiale en munisipale verkeer en wetstoepassing en die media verslag oor gebeure.
Waterkwaliteit
Die waterkwaliteit van nie net die Blouvlagstrande nie, maar ook die onderskeie riviere in die area word gereeld en volgens voorskrif deur beide die munisipaliteit en distriksmunisipaliteit se gesondheidsafdeling getoets. Daar is geen rede tot kommer nie, die water in die riviere - ook die Groot-Brakrivier is skoon en geskik vir ontspanningsdoeleindes.
Die verteenwoordigers van die Blouvlagkomitee het juis vandeesweek weer inspeksie by die onderskeie Blouvlagstrande afgelê.
Lewensredders
Hoewel lewensredders by die 23 swemstrande in die groter Mosselbaai ontplooi word, word versoek dat vakansiegangers daarop moet let dat sommige strande, onder meer Danabaai se strande, nie geskik vir swem is nie. Danabaai se strande is weens verskeie sleurstrome baie gevaarlik en die nodige kennisgewings is aangebring om besoekers te waarsku.
Lewensredders vra dat strandgangers hul instruksies moet gehoorsaam omdat dit lewens kan red. "Daar is spesifieke afgebakende areas waar dit veilig is om te swem. Deur in ander areas te swem, word nie net die swemmer nie, maar ook lewensredders se lewens in gevaar gestel sou 'n probleem ontstaan."
Drank op strande
Besoekers moet daarop let dat drank hoegenaamd nie op strande of in die parkeerareas by strande toegelaat word nie.
"Daar sal geen genade betoon word nie. Die nodige kennisgewings is aangebring, strandgangers moet gehoor gee aan reëls en voorwaardes vir die gebruik van strande. Die reëls geld om die strandervaring vir almal aangenaam te maak," het Coetzee benadruk.
Padveiligheid
'n Nuwe tendens is dat jongmense in die KwaNonqaba-area mekaar uitdaag om voor aankomende verkeer oor die N2hoofweg te hardloop. "Die spoedgrens is 120 km/h, kinders hardloop oor twee bane, dis lewensgevaarlik," het die hoof van provinsiale verkeer, Reinet Sarikakis gesê.
Sy het 'n beroep gedoen dat motoriste uiters versigtig op die hoofweg moet bestuur.
Strandwagte
Benewens wetstoepassingsbeamptes en polisielede patrolleer strandwagte ook misdaadknelpunte. Die lewensredders maan egter strandgangers om bedag te wees op ander strandgangers. "Nie almal besoek die strand om te ontspan nie, sommige mag misdadigers wees wat 'n geleentheid soek om vinnig met waardevolle items weg te kom. Strandwagte het al sogenaamde strandgangers ingehardloop en goed wat gebuit is, herwin," sê die voorsitter van die Mosselbaai-GPF, Leon van Dyk. Oor die naweek van 21 Desember sal weer agt perde berede patrollies op strande uitvoer.
Dronkbestuur
Daar word geen genade betoon met motoriste wat dronk bestuur nie. Die bevelvoerder van die Mosselbaai-polisiestasie, lt kol Albert Haggard het benadruk dat 'n misdaadrekord nie die kersgeskenk is waarop enigiemand kan hoop nie.