Polisie hande vol met 2 botsings
Op 31 Desember het verkeerspolisie hul hande vol gehad nadat twee botsings kort op mekaar in Hartenbos gevolg het. Polisiewoordvoerder kapt Wollie Fourie sê die eerste botsing het twee bakkies en 'n BMW ingesluit.
"Die 74-jarige bestuurder van een van die bakkies het oor die kruising in die rigting van Hartenbos gery toe hy van links deur nog 'n bakkie wat in die rigting van Brandwag gery het, getref is. 'n BMW is kort daarna deur een van die bakkies wat oor die pad geskuur en gerol het getref." Die bejaarde bestuurder is met ernstige beserings na 'n hospitaal afgevoer.
Kort daarna was daar 'n kettingbotsing waarby 'n polisievoertuig en nog drie ander voertuie betrokke was, aan die anderkant van die Hartenbosheuwels se ingang. Slegs ligte beserings is in die voorval opgedoen. Twee sake van roekelose en nalatige bestuur word ondersoek.
* Twee volwassenes van Mosselbaai, 'n man en 'n vrou, wat bekend was as 'n gimnasium-instrukteur, is op 21 Desember omstreeks 17:00 volgens inligting op slag dood in 'n trompop-botsing op die N2 naby Heidelberg. Die vrou se tweejarige seuntjie was ook in die Hyundai-voertuig toe dit teen 'n Ford Ranger-bakkie gebots het en is ernstig beseer. Hy het nie lank na die ongeluk aan sy beserings beswyk.