Dronkbestuurders vasgevat
Dronkbestuurders is die afgelope Desember vasgevat. Wes-Kaapse verkeershoof, Kenny Africa sê verskeie mense is tydens die vakansieseisoen in die Suid-Kaap in hegtenis geneem. Boonop was een van die hoogste lesings in die Mosselbaai gebied gerapporteer.
Die bestuurder is tussen 4 en 5 Januarie van die pad afgetrek en sy lesing was vier keer oor die limiet.
Intussen sê polisiewoordvoerder, kapt Malcolm Pojie minstens 815 mense is vanaf 27 Desember tot 30 Desember vir verskeie oortredings in hegtenis geneem. Die operasie staan bekend as Safer Festive Season. Dit het strandpatrollies, padblokkades, en die deursoek van voertuie op verskillende punte behels.
Pojie beskryf die afgelope seisoen as "eintlik rustig" en sê dit is te danke aan goeie polisiëring en die samewerking van buurtwagte.
Hoewel dronkbestuur volgens die departement van vervoer die hoofoorsaak van ongelukke op paaie die vakansie was, speel spoedoortredings en roekelose en nalatige bestuur ook 'n rol. Woordvoerder van die departement van vervoer, Ishmael Mnisi sê egter, baie ongelukke is ook deur moeë bestuurders gemaak.
Meer as 190 mense het Desember hul lewens op paaie in die Oos-Kaap verloor, waarvan 70 voetgangers was.