Skoenskenking kom weer handig te pas
Vanjaar is die sewende jaar dat oud-Mosselbaaier Curt Baker sy skoenprojek aanpak. Meer as
300 leerders, van verskeie skole in Mosselbaai, het nou al baat gevind by hierdie projek.
Hy maak sy vriende, familie en sosiale media-kennisse deel van die projek en woeker reeds vanaf November elke jaar om die skoolskoene in te samel. Van die begunstigdes is vanjaar Diaz Primêre Skool, waar Curt skoolgegaan het.
Elke jaar daag menigte kinders by skole op sonder ordentlike skoolskoene. "Dit is hoekom ek en my vriende graag hierdie verskil wil maak.
Daar is steeds baie hulp nodig by skole soos om sanitêre doekies en basiese toiletware te skenk." Curt rig 'n uitdaging aan elke oud-leerder van Diaz Primêr om 'n klein projekkie te begin om selfs net 'n paar kinders te help as hulle kan.
"Ek bedank elkeen wat skoolskoene gekoop het en wat jaarliks die projek ondersteun."