Uitbuiting van vakansiehuiseienaars
Braam Grobler, skryf:
Hiermee wil ek 'n klagte lê teen die DA beheerende Mosselbaai-munisipaliteit vir die uitbuiting en diskriminasie van die vakansiehuiseienaars.
Ek het vantevore by die minusipaliteit gekla oor die feit dat die vakansiehuiseienaars uitgebuit word wat betref munisipale tariewe met betrekking tot basiese elektrisiteit-, water-, vullis- en riooltariewe waar hierdie groep eienaars dubbel aangeslaan word in vergeleke met die permanente inwoners.
Die DA-beheerde munisipaliteit lewer geen, maar geen addisionele dienste aan die eienaars nie en reken net doodeenvoudig te verklaar dit is ons beleid en klaar.
My vorige skrywe was oner andere gerig aan die munisipale bestuurder maar díe is skynbaar te besig om te antwoord en bogenoemde boodskap is telefonies aan my oorgedra deur 'n klerk.
Nou word daar gesê ja maar ons elektrisiteit wat ons aankoop is goedkoper as die permanente inwoners se tariewe. Ons wil dit dit nie hê nie ons wil almal oor dieselfde kam geskeer word.
Ons sit watertenks op om water te bespaar wat op ons tuine gebruik word maar dit word nie in aggeneem nie.
Nou onlangs het die munisipaliteit in die Advertiser geadverteer van hulle vergadering en het gevra vir insette wat betref die tarief skema. Ek het my insette gelewer en gevra dat al die inwoners oor dieselfde kam geskeer moet word en al wat ek terug gekry het is hulle finansiële state maar geen erkenning van my voorstel en dat in aggeneem sal word nie. Verder is julle bewus van die feit dat elke belasting betalende inwoner van Mosselbaai se eerste 20 gratis elektriese eenhede net doodeenvoudig in Julie 2018 weggeneem is en vir die sogenaamde armes gegee is.
Hierdie sogenaamde armes is heel moontlik die nie belastingbetalers wat heel moontlik verantwoordelik is vir die aanvalle by Diasstrand en die aanval op 'n 80-jarige inwoner van Santos Haven-aftreeoord op Sondag, 2 Desember. Kommentaar:
Die munisipale woordvoerder, Colin Puren reageer: Mosselbaai-munisipaliteit verwelkom enige en alle huiseienaars. Ons neem met ontsteltenis kennis van skrywer se onwaar bewerings oor uitbuiting en diskriminasie. Geen persoon word dubbel aangeslaan vir enige munisipale diens nie.
Die munisipaliteit hef ‘n basiese- en verbruikstarief ten opsigte van dienste. Die basiese tarief word gehef om die vaste kostes van die dienste te dek, dit is koste wat in elk geval deur die munisipaliteit aangegaan moet word ongeag of die diens gebruik word en sluit in koste soos kapitale koste, verspreidingskoste, pype, kabels, instandhoudingskoste, lisensiegelde, ensovoorts. Die verbruikstarief verhaal die koste wat aangegaan word omdat daar verbruik is en sluit in aankoopkoste, vervoerkoste, personeelkoste, ensovoorts.
Dit is so dat buite-seisoen dienste aan vakansie-eenhede gewoonlik laag is maar die infrastruktuur moet elke dag beskikbaar wees en instand gehou word. Die basiese tarief is dus geensins uitbuiting nie maar gesonde finansiële bestuur om ‘n horisontale en vertikale billike verdeling van koste vir die diens te verseker.
Hierdie is van die beginsels wat bespreek word by die vergaderings wat nou oor die tariewe gehou word. Dit is belangrik om publieke kommentaar, veral vanaf inwonders, te bekom op hierdie en ander beginsels waarop munisipale belasting en tariewe gebasseer word.
Skrywer is korrek in dat weggedoen is met die gratis eerste 20 eenhede elektrisiteit per maand.
Hierdie voordeel was slegs beskikbaar aan persone in die maand waarin hulle elektrisiteit aankoop en permanente inwoners was hierdeur bevoordeel. Skrywer laat ook na om te meld dat die styging in elektrisiteitstariewe, vanaf R1.381 na R1.443 per eenheid, ‘n slegs 4.5% styging was.
Die munisipaliteit verduidelik graag sy tariefstruktuur aan persone wat belangstel.