Ryan se droom skitter met myle
Die 20-jarige Ryan Mphahlele (Tembisa) was ongetwyfeld die ster van die 2018 Bestmed Eden-straatmylreeks.
Al het hy sy derde droomstraatmyl binne vyf dae met ‘n skrale 1,88 sekondes misgeloop en so 'n R5 000 bonus gemis, het hy sy stempel onteenseglik afgedwing.
Hy is dan ook gekroon as die Bestmed Kovsie Gran Prix-manswenner. Die die vrouewenner was Thineke Cloete (Stellenbosch) terwyl Lloyd Bosman (Nedbank) en Elne Conradie (Hartenbos Drawwers) onderskeidelik die SWD Gran Prixwenners was. Volgens Hans van der Veen, voorsitter van KKAF en ook die reëlingskomitee, dui vanjaar se reeks op ‘n 20% groei en boonop was die eerste vier mans en eerste drie vroueatlete se wentyd van 2018 beter as die wenners van 2017.
"Dit dui ook op die verbetering in die alge- mene standaard van die deelnemers," het Van der Veen gesê. Op Hartenbos het meer as 200 atlete in gunstige weersomstandighede deelgeneem. Wikus Kotzé, direkteur van Bestmed, het ook die professionele reëlings geloof en hulde gebring aan die reëlingskomitee. Dave van der Walt, operasionele bestuurder van die KKAF, het in sy bedankings hulde gebring aan al die borge wat hierdie reeks moontlik gemaak het – Bestmed, NMU Madibaz Sport, Wes-Kaap departement van kultuursake en sport, Kovsies, KKI, Oudtshoorn Ford, Group Editors, EdenFM en ASWD.
Hy het ook die besondere samewerking met die verskillende verkeersdepartemente uitgelig en veral verwys na ER24 wat by aldrie die straatmyle uitstekende diens gelewer het.
EdenFM het ook gesorg dat aldrie die straatmyle lewendig uitgesend is en so meer as 250 000 plaaslike luisteraars kon bereik.
Wenners in die onderskeie kategorieë is: Ryan Mphalele (mans ope), Irvette van Zyl (Nedbank-atletiekklub),
Lloyd Bosman (ASWD mans ope),
Elné Conradie (ASWD vroue ope), Corné de Fouw (sub junior seuns), Christolique Mc Niel (sub junior meisies), Daniel Maton (junior seuns), Cara du Preez (junior meisies), Walter Lutsch (mans 40 en ouer) en Marili Munnik
(vroue 40 en ouer).