Koördinering lei tot goeie seisoen
Die effektiewe koördinering van dienslewering deur die seisoenmoniteringskomitee onder leiding van die Mosselbaai-munisipaliteit is grootliks die rede vir 'n baie suksesvolle somervakansieseisoen.
Boonop meen die rolspelers wat aan die moniteringskomitee deelgeneem het dat die gesamentlike koördinering van funksies, verantwoordelikhede en rolle nie net tydens die somervakansie nie, maar ook tydens die res van die jaar die norm behoort te wees. 'n Beroep is gedoen dat diegene wat by die seisoenmonitering betrokke was, ten minste maandeliks byeen moet kom en nou reeds met beplanning moet begin vir die 2019 somervakansie - wat heelwat langer sal wees as die afgelope 2018-somervakansie.
Veiligheid
"Die effektiewe funksionering van die onderskeie buurtwagte, die gemeenskapspolisiëringsforum en wetstoepassers het misdadigheid tot die minimum beperk. Die waarde van die voetpatrollies, viertrekmotorfietse en perde op die strande by bekende misdaadknelpunte het misdadigers hokgeslaan en, benewens een of twee voorvalle vroeg in die seisoen is geen verdere misdadigheid daar aangemeld nie.
"Die strandgangers en besoekers was baie ingenome met die verhoogde sekerheidsmaatreëls en veral met patrollies wat voor sonop en selfs tot na sononder strande vir almal veiliger gemaak het," berig Duppie du Plessis van die Diasstrandbuurtwag.
Hy meen tog dat 'n strandbestuurder vir sommige van die meer gewilde strande aangestel kan word om beter koördinering van die onderskeie funksies op strande te verseker.
Du Plessis het die hoogste lof vir die munisipale bestuurder, adv Thys Giliomee wat vir die duur van die feesseisoen gereeld opsigtelik sy deel tydens strandpatrollies gedoen het en sy personeel aangemoedig het om selfs nog beter diens te lewer.
"Maak nie saak wat die knelpunt was nie, die munisipale bestuurder was bewus daarvan, het seker gemaak sy personeel hanteer dit - selfs voortydig om probleme te voorkom - en het nie gehuiwer om self betrokke te raak nie."
Vullisverwydering
Die direkteur gemeenskapsdienste, Elize Nel bedank inwoners vir hulle begrip, geduld en samewerking met die effektiewe vullisverwydering tydens Kersfees en Nuwejaar.
"Die munisipaliteit het spesifiek vir 26 Desember ekstra personeel bekom om te help. Dit het ‘n baie groot verskil gemaak. Die spanne was om ongeveer 19:00 klaar. Op 2 Januarie is ekstra mense nie gebruik nie, maar personeel was ook om ongeveer 19:00 klaar met die rommelverwydering. Die hulp van die buurtwagte se WhatsApp-groepe in dié verband het beslis ‘n groot verskil gemaak," aldus direkteur Nel.
Strande
Bykans 400 000 strandganers het tussen 1 Desember en 1 Januarie strande in en om Mosselbaai besoek en lewensredders het in daardie tyd hul hande vol gehad met nie net reddingspogings uit die see nie, maar ook met strandgangers wat erge sonbrand opgedoen het of wat onder bloublasies deurgeloop het. Die somerweer het mense na strande gelok en winkeliers meen dit is een van die redes hoekom veral kos en drinkgoed, maar nie ander ware nie, besonder goed verkoop het.
Diasstrand, met net meer as 95 000 besoekers in daardie tyd, was verreweg die gewildste strand, hoewel die besondere warm somer talle ook na Santos (36 000+), De Bakke (5 000+), en Cloete se Gat (61 000+) gelok het. Ook Vleesbaai (11 000+), KleinBrakrivier (20 000+), Koffiehuis (15 000+) en Nooitgedacht (11 000) het groot getalle besoekers gelok.
Tog het lewensredders op verskeie strande geen reddingswerk gehad nie, onder meer by Tidals, Tweekuilen, Bayview, Suiderkruismond,
Gleniqua, Dwarsweg-, Onderwyser-, Pienaaren Outeniquastrand.
Daarenteen is
180 keer op die onbaatsugtige diens van lewensredders staatgemaak, onder meer by die Poort (28 keer tussen 1 Desember en 1 Januarie). In dieselfde tyd is by Diasstrand (11), Nooitgedacht (17), Koffiehuis (15), Klein Brak (28) en Suiderkruis (44) op lewensredders staatgemaak om lewens te red.
Tegelyk het lewensredders 305 gevalle van bloublasieskade hanteer en 226 keer hulp verleen waar strandgangers snywonde op die strand opgedoen het. Slegs in een geval is 'n persoon vir 'n vermoedelike hartaanval behandel.
Vuurwerke
Inwoners en vakansiegangers het egter geen ag geslaan op herhaalde vermanings in gedrukte en sosiale media dat die afvuur van vuurwerke in die groter Mosselbaai onwettig is nie. Op Danabaai het besope jongmense op Oujaarsaand vuur op die strand gemaak ondanks droë bosse en houthuise in die onmiddellike omgewing. Vuurwerke is afgevuur en geen ag is geslaan op vermaninge dat die optrede gestaak moes word nie. Wetstoepassers was ook nie beskikbaar om die skuldiges aan te keer nie. Hierbenewens is op beide Eerste en Tweede Strand vuurwerke afgevuur en buurtwaglede het hul hande vol gehad om orde te handhaaf.
Hierdie wettelose optrede was nie tot Danabaai beperk nie. By talle huise is vuurwerke ook afgeskiet. Ongeag die wettige vuurwerkvertoning in Hartenbos wat heelwat ondersteuners gelok het, het vuurwerke regoor Mosselbaai weerklink.