‘n Somer van son, see en genot
Die 2018-somervakansie het talle uitdagings vir Mosselbaai ingehou. Die verkorte skoolvakansie het `n groot impak gehad op die toevloei van besoekers. Tydens die eerste twee weke van Desember was weinig beddens gevul, soos ook die tydjie na Nuwejaar tot en met die begin van die skole, aldus Aneli Gerber, uitvoerende hoof van Mosselbaai Toerisme.
Tradisioneel het elk van hierdie tydperke twee volle weke meegebring wat vakansieplanne buigsaam maak, wat vanjaar nie die geval was nie.
Daar was talle op die nippertjie kansellasies wat feitlik nooit die geval is nie.
Die huidige ekonomiese klimaat het ook meegebring dat besoekers hul vakansie ingekort of selfs gekanselleer het.
Dit het ook stremming op vakansiebegroting gelê.
Bars uit sy nate
Vanaf 22 Desember het die dorp uit sy nate gebars, maar daar is duidelik 'n tendens dat vakansiegangers nie soos gewoonlik na hartelus gekoop, geëet en kerjakker het nie. Tog is daar besighede wat `n puik seisoen gehad het met goeie groei en talle wat vorige jare se prestasie gehandhaaf het.
Daar was, aldus Gerber, gemengde gevoelens en reaksie vanaf rolspelers in die toerismebedryf.
Mosselbaai Toerisme bedank al die rolspelers wat hulself puik van hulle taak gekwyt het om seker te maak dat vakansiegangers veilig was en weer ongedeerd na hul huise kon terugkeer.
"Ons bedank die munisipaliteit wat onverpoosd gewerk het om te sorg dat die dorp skoon is en netjies vertoon en dat daar geen onderbreking in dienste was nie, asook die provinsiale en munisipale verkeersbeamptes wat deurentyd hul hande vol gehad het, maar nogtans uiters behulpsaam en op hulle poste was.
“Wetstoepassing, die gemeenskapspolisiëringsforums en die buurtwagte het puik, onbaatsugtige diens gelewer en het met toewyding daartoe bygedra dat die seisoenstatistieke verblydend is," berig Gerber.
"Aan al die lewensredders, mediese dienste, rampbestuur en vrywilligers ons hartlike dank vir lang ure in die warm son. Hierdie spanpoging maak Mosselbaai uniek en is dit weer eens duidelik hoekom Mosselbaai herhaaldelik Suid-Afrika se voorkeurdorp is."