Tuine en Tossels hou vergadering
Tuine en Tossels se Junie-byeenkoms is deur Wilna Redelinghuys en haar span aangebied. Ten spyte van die koue en wind was dit ‘n vrolike affêre. ‘n Glasie sjerrie by aankoms het net die regte atmosfeer help skep. Die Beachcomber Restaurant waar daar bymekaargekom is, was vrolik versier met pragtige ruikertjies, mooi servette ensomeer op die tafels.
Christine Haggard het die verrigtinge begin deur ‘n stukkie te lees oor drome. “Dit is nooit te laat om jou drome uit te leef nie. Moenie jou droom begrawe nie.”
Leonie noem dat Tuine en Tossels nou ook “omgee vir mekaar” by hul missie gaan voeg en noem dat daar tans verskeie van die lede is wat siek is en deur moeilike tye gaan.
Sowat 10 van die Tuine en Tossels-lede gaan behulpsaam wees by Arbeidsbediening se funksie in die stadsaal waar Tuine en Tossels verantwoordelik is vir die tafelrangskikkings.
Sprekers tydens die Junie-byeenkoms was Francois Kotze, Jaco Claassen, Ant Canibus en Nadene Campbel.
Francois Kotze van die Duitse Deli in Voorbaai het ‘n groot bord gerookte kouevleis geskenk. Daar was ook ‘n uitstalling van die heerlikste vleise wat hulle maak en proehappies het beslis groot byval onder die vroue gevind.
Eden Epoxy se Johan Boshoff kon ongelukkig nie self teenwoordig wees nie, maar sy assistent Jaco Claassen het sy skoene volgestaan en die proses verduidelik. Daar was verskillende voorbeelde van hierdie veelsydige produk. Die produk kan byvoorbeeld gebruik word om ‘n tafel se blad mee oor te trek.
Ant Canibus wys al die verskillende olies en salwe wat van dagga gemaak word. Daar is baie salwe, pille en produkte beskikbaar. Vorige geslagte het jare gelede reeds daggatee gemaak vir verskillende kwale. Cannabis word deesdae baie gebruik as ‘n alternatiewe manier van genesing en pynbeheer, veral by kankerpasiënte. Dit is ook baie goed vir hoë bloeddruk. Ant het ‘n lisensie vir die vervaardiging van al die produkte wat hy te koop aanbied.
Nadene Campbel het ‘n pragtige uitstalling van grimeerprodukte gehad wat organies en mineraalryk is. Sy het baie goeie wenke gegee, veral vir ouer vroue oor die moets en moenies van grimering. ‘n Paar vroue het gegaan vir ‘n mooimaaksessie en het pragtig (en veel jonger) gelyk nadat sy met hulle klaar was.
Leonie Coetzee het wenlootjie gehad wat haar ‘n geskenk van 4 Cousins in die sak gebring het. “Groot dank aan hulle vir die bydrae.”
Daar is geen byeenkoms gedurende Julie nie.