Barbarians wen
Barbarians het die afgelope naweek 'n begeesterde Bridgton van Oudtshoorn op die D'Almeida-stadion oortuigend met 34-22 geklop. Die tuisspan, wat verlede jaar in die liga se finaal gespeel het, het die afgelope paar wedstryde gesukkel om hul kanse in punte om te skakel.
Barbarians het egter gewys dat die span nie hul ondersteuners gaan teleurstel nie. Hoewel daar oomblikke was waar die spanning hoog geloop het, was dit met die begin van tweede helfte duidelik dat die afrigter, Robert Jansen halftyd hard gepraat het want die voor- en agterspelers het daarna in 'n oogwink twee pragdrieë gedruk en die voortou geneem. Die besoekers het egter vinnig teruggeslaan om die telling weer gelyk te maak.
Hen-llin Botha, loskakel van Baabaas wat 'n baie goeie wedstryd gehad het saam met die twee Fillies-broers, wat vir die eeste keer saam gespeel het, het egter ander planne gehad. Botha het vir Kervin Fillies deur 'n swakplek in die verdedigingslinie gestuur deur talle verdedigers af te skud en te gaan druk. "Krediet gaan aan die afrigters, hoewel aan die span se dissipline gewerk moet word," sê voorsitter Dawid Kamfer. Hy meen die span moet kalm onder druk reageer en sê: "Spelers soos Dillion Africa, Bees, Alo Fillies, kaptien Brettas en Bekker verdien 'n pluimpie vir hulle spel."
Die derde en tweede spanne het ook hul wedstryde gewen. Barbarians reis komende Saterdag na Plettenbergbaai.
Kamfer het laat blyk dat hy op klagtes teen hom deur SWD onskuldig bevind is.