Rower vas na misdaad
Danksy vinnige optrede van lede van die Da Gamaskop-polisie is 'n vermeende rower verlede week aangekeer kort nadat die beweerde misdaad gepleeg is.
As gevolg van verskeie voorvalle van roof wat in die stasie se bedieningsarea aangemeld is, het die polisie in samewerking met buurtwaglede verskerpte patrollies in die omgewing van Uitbreiding 8 en Uitbreiding 13, asook die kloof wat die areas verbind, geloods.
Kaptein Deon Bothma en adjudant-offisier Anita Pio het op Donderdag, 11 Julie vanaf 06:00 patrollie gedoen toe hulle op 'n vrou afkom wat berig dat sy sopas beroof is. Sy kon 'n akkurate beskrywing van die verdagtes voorsien. Die lede se vinnige optrede het tot die arrestasie van 'n 24-jarige verdagte gelei. Tydens deursoeking van die verdagte, is beslag gelê op verskeie gevaarlike wapens in sy besit. Die tweede verdagte is geïdentifiseer, maar hy is steeds op vlug.
Twee sake van roof met 'n wapen anders as 'n vuurwapen word ondersoek deur die Da Gamaskop-polisiestasie se speurafdeling.
"Ons versoek die gemeenskap om by
buurtwagte betrokke te raak. Rooftogte is gerapporteer in Diasstrand op die rotse, Louis Fourieweg naby Blue Waters, Alhof- en Bill Jeffrey-rylaan, asook die kloof tussen Uitbreiding 8 en 13. Daar is gebiede waar die konstante teenwoordigheid van buurtwagte noodsaaklik is om die polisie te ondersteun," maan kapt Wollie Fourie, woordvoerder van die Da Gamaskop-polisie.