Verdagte in hof na hotelroof
Die polisie op Groot-Brakrivier het ‘n 22-jarige verdagte in hegtenis geneem na die onlangse gewapende roof by die Eden Country Inn.
Die man het op Maandagaand, 8 Julie by die hotel op Klein-Brakrivier ingestap en die ontvangsdame met ‘n vuurwapen gedreig. Hy het daarna R17 000 kontant uit die kasregister geneem en te voet gevlug.
Polisiewoordvoerder sersant Laurianne Botha sê die verdagte is op Vrydag, 12 Julie, op Klein-Brakrivier in hegtenis geneem. Sy bevestig die kontant is egter nie teruggevind nie. Die verdagte het op Maandag, 15 Julie in die Mosselbaai-landdroshof verskyn op ‘n aanklag van besigheidsroof.