Groot planne vir Oliver Twist-projek

Mossel Bay Advertiser se Oliver Twistprojek en ReedValley-span weer kragte saam om deur welwillendheid die groter Mosselbaaigemeenskap van diens te wees.

Vir die derde jaar gaan ReedValley 100% van die kaartjieverkope vir 'n swierige bal op 3 Augustus aan die Oliver Twist-gemeenskapsprojek skenk. In oorleg met die organiseerders, is besluit om vanjaar dié geld aan te wend vir 'n uitkyktoring vir lewensredders wat jaarliks 'n onmisbare diens op strande in die omgewing lewer.

Vanjaar sal die groep, Lonesome Rangers se musiek die gaste op die dansvloer hou en daar word fluks gevorder met die insameling van voorkeur-items wat tydens die bal opgeveil sal word. Mosselbaaiers kan solank begin beplan vir hierdie semi-formele byeenkoms in die unieke ligging en atmosfeer van ReedValley, waar 'n verwelkomingsdrankie 'n heerlike driegangmaaltyd, voortreflike musiek en 'n veiling sal voorafgaan. Beslis waarde vir geld, vir 'n goeie doel - 'n heerlike aandjie uit saam met vriende, familie of kollegas terwyl elke sent daarvan vir welwillendheid aangewend sal word.

Vir enige navrae skakel Shirley Coetzee (084 557 1126) of Susan Graaff by die Advertiser se kantore (044 690 7156).

Beslis waarde vir geld, vir ‘n goeie doel - ‘n heerlike aandjie uit saam met vriende, familie of kollegas.