Klawerklanke by Klassique
Liefhebbers van klawermusiek het hope om na uit te sien by hierdie jaar se Klein Karoo Klassique tussen Donderdag, 8 en Sondag, 11 Augustus op Oudtshoorn.
“Die program bevat ’n variasie van musiek, van klavier, tot orrel en marimba – uitgevoer deur bekroonde kunstenaars in beide solo-uitvoerings en as begeleiers vir ander musici,” sê Hugo Theart, artistieke direkteur van dié fees.
Plaaslike pianis Sulayman Human keer terug na sy tuisdorp in When poets speak op Vrydag, 9 Augustus om 14:30. Die inhoud van sy program is geïnspireer deur donker poësie, asook dapper poësie, waaronder Gaspard de la Nuit deur Aloysius Bertrand en Divine Comedy deur Dante Alighieri.
Op Saterdag, 10 Augustus om 14:30 speel Erik Dippenaar orrelmusiek in Transkribarok, met transkripsies van gewilde orkeswerke uit die Barok-periode. Die program sluit Handel se Musiek vir die Koninklike Vuurwerke, Watermusiek en Die Aankoms van die Koningin van Skeba in. Dippenaar is ’n multi-bekroonde kunstenaar en tans artistieke direkteur van die Camerata Tinta Barocca, ’n Kaapstadgebaseerde barok-ensemble wat reeds twee keer vantevore by Klein Karoo Klassique opgetree het.
Theart vertel verder dat Klassique vanjaar vir die eerste keer sedert 2015 ’n galakonsert aanbied, waartydens die gehoor klaviermusiek deur die jong Qden Blauw gaan hoor. “Ons is baie opgewonde om vir Qden by Klassique te verwelkom. Hy het reeds verskeie pryse gewen en is op 15-jarige ouderdom die jongste solokunstenaar wat tot dusver by dié fees opgetree het.” Blauw lei die Galakonsert se program op Saterdag, 10 Augustus om 19:00 in. Die gehoor kan verder uitsien na klavierbegeleiding vir die drie soprane - Minette du Toit-Pearce, Lynelle Kenned en Janel Speelman – deur Philippus Hugo.
Klassique sluit op Sondag, 11 Augustus om 14:30 af met ATKVVirtuose in konsert wanneer pianis MeganGeoffrey Prins, wenner van ATKV-Muziq in 2016, vir bariton Bongani Kubheka en saksofoonspeler Cameron Williams begelei. Prins se vingerdanspassies op wit-en-swart klawers het hom al verskeie toekennings besorg.
’n Spesiale kaartjiepakket, moontlik gemaak deur die ondersteuning van die Rupert-musiekstigting, stel feesgangers in staat om elke noot by Klassique te hoor en boonop R240 te spaar. “Feesgangers moet gou speel vir hul pakkette, aangesien dié aanbod uiters gewild is en ook vinnig uitverkoop,” sluit Theart af.
Die volledige feesprogram is beskikbaar by www.klassique.co.za en kaartjies kan by Computicket, Shoprite/Checkers, House & Home, of aanlyn by www.computicket. com gekoop word. Vir meer inligting, kontak Kunste Onbeperk se kantoor by 044 203 8600, of info@kunste.org.za.