Polisie neem saak van die jeug op

Vroeër vandeesweek het polisielede gemoeid met sosiale misdaadvoorkoming, asook verskeie sektorbevelvoerders verteenwoordigend van die Da Gamaskoppolisiesone se 11 polisiestasies in Mosselbaai vergader om strategieë te bespreek.

Kolonel Johnnie Stripp van die Da Gamaskop-polisiesonekantoor het die vergadering gelei.

Een van die eerste sprekers tydens die byeenkoms was Josie Domingo van die Mosselbaai Gemeenskapsorkes. Hy het hierdie bekroonde blaasorkes se toekennings en trofeë uitgestal om die lede te wys waartoe die orkes instaat is.

Domingo het verlede jaar in opdrag van die bevelvoerder van die Da Gamaskoppolisiesone, brig Gerhard Jantjies betrokke geraak by dril- en musiekopleiding by Erika Primêre Skool in ‘n poging om weer dissipline onder die jeug te vestig, asook om ‘n gesonde, konstruktiewe tydverdryf daar te stel.

In samewerking met die Da Gamaskoppolisie, het leerders van Erika Primêre Skool vir drie weke intensiewe opleiding gekry gedurende die winter skoolvakansie, waarna hulle ook geleentheid gekry het om op te tree in die openbaar. Hulle het ook kompetisieblootstelling gekry.

Kolonel Johnnie Stripp van die sonekantoor het aan die lede teenwoordig die noodsaaklikheid van programme gefokus op die jeug uitgestip.

Hy het gesê dat daar belê moet word in die dissipline van Suid-Afrika se toekomstige leiers en dat dril- en musiekopleiding

‘n voet in die deur is om ‘n belangrike opvoedingstaak te verrig.

Kolonel Stripp het voorts gesê dat die lede ook moeite moet doen om gemeenskapspolisiëringsforums by hierdie tipe inisiatiewe betrokke te kry.

Sektorbevelvoerders en sosiale misdaadvoorkomingsbeamptes tydens ‘n strategiese sessie rakende jeugontwikkeling vroeër vandeesweek. Staande inks is kolonel Johnnie Stripp, sameroeper van die byeenkoms.

Josie Domingo van die Mosselbaai Gemeenskapsorkes spreek lede van die polisie toe. Voor hom is van die orkes se toekennings.