Nuwe vuur brand
Die jaarlikse Kansa Relay For Life wat Saterdag en Sondag, 26 en 27 Oktober by die ATKV se amfiteater in Hartenbos gehou is, was weer eens 'n groot sukses.
Die wenspan vanjaar was die Hillies-span wat met 'n onblusbare en inspirerende gees, hulle plek as die top fondsinsamelaars van die geleentheid, verdedig het. Hulle het bykans R20 000 bygedra tot vanjaar se Relay For Life. Die gasspreker was Burre Burger van Droogtehulp SA. Verskeie plaaslike kunstenaars het seker gemaak dat daar vir almal iets sags op die oor was tydens die groot stap. Die program het Saterdag om 17:00 afgeskop met valskermspringers wat op die veld geland het.
Burre Burger het die eregaste, die kankeroorwinnars, die versorgers, onderburgemeester raadsheer Dirk Kotzé, die aflosspanne, gaskunstenaars en elke besoeker verwelkom. Dominee Henri Meyer van die Mosselbaai NG-gemeente het die skriflesing waargeneem waarna raadsheer Kotzé 'n boodskap gebring het aan die oorwinnaars en die versorgers.
John Haas het die landslied gesing waarna die voorsitter van die Kansa Relay For Life Mosselbaai, Ernie Jacobs, 'n paar woorde gespreek het. Burger het toe die Kansa Relay For Life-eed voorgelees. Die voorsitter van Oudtshoorn, Japie Coetzee het die vlam van hoop oorhandig aan Ernie Jacobs, waarna hy en 'n kankerpasiënt die groot vlam van hoop aangesteek het wat deur die nag gebrand het.
Die hoogtepunt was natuurlik die luminaria-seremonie wat baie emosioneel was. Gedurende hierdie geleentheid word diegene wat hul stryd teen kanker verloor het gedenk. Tydens die aand was daar verskeie temarondtes, soos 'n rondte van stilte, 'n driebeen-rondte, 'n kombers-rondte, sakresies en vele meer wat deur beoordelaars beslis is.
Sanger Vernon Barnard het later die aand mense trakteer met sy sang. Ander kunstenaars wat opgetree het sluit in Mariena Stander, Arisa, John Haas, Amoré Barnard, Onblusbaar, Juandré Barnard, Magnus, Dihandri en JP Ellard het die stappers gedurende die aand vermaak.
Die prysuitdeling is die Sondagoggend om 05:00 gehou met moeë, koue stappers met seer lywe wat reeds uitgesien het na 'n dag van slaap inhaal. Daarna het die 2019 Kansa Relay For Life Mosselbaai amptelik geëindig en het baie deelnemers met moeë lywe huis toe gegaan.
Die Kansa Relay For Life is 'n wêreldwye gebeurtenis waar spanne oor 'n tydperk van 12 ure 'n aflos om 'n baan stap en waartydens ten minste een van die spanlede ten alle tye op die baan moet wees.