Geweld lei tot ernstige beserings

Verskeie voorvalle van geweld het gedurende die afgelope ses maande plaasgevind wat gelei het tot ernstige beserings of lewensverlies, berig kaptein Wollie Fourie van die Da Gamaskop-polise.

In die meeste gevalle was die slagoffers geroof of uitgelok tydens voorafgaande argumente.

'n Onlangse voorval was die lewensverlies van twee tieners, beide aan dieselfde skool. Michaela Booysen (17) en Khuselo Ndanda (16), beide van Hillcrest Sekondere Skool, is vermoor in Oktobermaand tydens onverwante voorvalle.

"Daar rus 'n groot verantwoordelikheid op die polisie maar nog 'n groter een op die gemeenskap en buurtwagte om strukture in plek te kry en 'n gesindheid van verdraagsaamheid en respek te kweek. Elke slagoffer is iemand se kind," sê kapt Fourie.

Die trauma en verdriet by ouers vat 'n leeftyd om te verwerk. Gesinsgeweld begin by elke woning en verhouding in gesinsverband. Die afgelope naweek tussen 01:00 en 05:00 was inwoners by twee voorvalle op Joe Slovo-woongebied deur 'n groep oortreders, geklee in klapmusse oorval en beseer. Met die oog op die jaareinde en feesseisoen wil die polisie inwoners weer waarsku.

"Neem kennis van waar u kind is terwyl u by die werk is. Kontak die Da Gamaskoppolisie by 044 606 2200 om 'n afspraak te maak wat 'n verteenwoordiger van Creating Effective Families na u woning kan stuur. Saam maak ons 'n verskil teen misdaad."