Seëvier, ook oor seer
Helena Haasbroek is nie enige hierjy nie. Op 53 is sy tans die top vrouetennisspeler in die Suid-Afrikaanse Polisiediens in haar kategorie. Tydens die kampioenskap wat in Oktober in Bloemfontein gehou is, het sy goud ingepalm en ook 'n bronsmedalje in die vrouedubbels.
Helena was haar lewe lank nog sportief en het vir vyf jaar, vyf verskillende sportsoorte beoefen. In al vyf het sy provinsiale en nasionale kleure verwerf. Dit sluit in atletiek, hengel, liggaamsbou, fiksheid en tennis. Sy is ook 'n kranige rolbalspeler.
Helena se triomf vanjaar, is ook 'n bietjie bittersoet. Haar groot liefde en lewensmaat, Fanie Niehaus is in Oktober
2018 oorlede. Fanie was 'n professionele gholfspeler, maar na 'n motorongeluk was hy rolstoelgebonde as kwadrupleeg. Helena het hom in 2006 op die tennisbaan ontmoet waar hy rolstoeltennis gespeel het. Die res is 'n merkwaardige verhaal van ware liefde en opoffering.
"Ons het saam begin reis vir Fanie se sport en ek het ook weer aktief begin deelneem." Helena was Fanie se regterhand en meer. Hulle was kookwater op die rolbalbaan en ook goeie kompetisie vir mekaar, vertel sy. Hulle het ook graag saam gehengel. "Fanie was selfstandig en kon nog baie goed vir homself doen. Mense is partymaal onder 'n wanindruk oor waartoe gestremdes in staat is." Na 'n rugoperasie in 2009, het Helena Fanie egter met selfs groter toewyding begin versorg. "Dit het alles baie spontaan en natuurlik gebeur. Hy was nooit vir my 'n las nie."
Daar is egter 'n aanloop tot Helena se tennistriomf vanjaar en Fanie is 'n groot deel daarvan. "Dit kom al van 2016 af. Ons gastehuis tydens die kampioenskap was nie rolstoelvriendelik nie. Fanie het nie lekker gebly nie. Dit was ongemaklik. Ek het my wedstryd aspris verloor sodat ons vroeër huis toe kon gaan." Dieselfde het in 2017 gebeur en in 2018, het sy glad nie deelgeneem nie. Fanie is intussen oorlede. Toe sy vanjaar gaan deelneem in Bloemfontein, was haar voorneme vas en gegrond op drie dinge. "Ek wou gaan om my man se lewe te vier. Ek wou myself gaan geniet en ek wou wen."
Na afloop van die kampioenskap het ander deelnemers haar tennis gekomplimenteer. "Ek was eintlik vyf maande uit spel uit gewees en het 'n besering gehad."
Sy sê sy sukkel nog om na Fanie se dood haar voete te vind. Maar 'n wen, is 'n wen.
Helena is verbonde aan die Da Gamaskoppolisie.