Driekampseisoen skop af in Groot-Brakrivier
Eden se driekampseisoen het verlede Sondag op Groot-Brakrivier met 'n rekordgetal deelnemers afgeskop.
Die byeenkoms was die eerste Triathlon SA (TSA) gesanksioneerde byeenkoms met heelwat nuwelinge wat vir die eerste keer deelgeneem het.
Verskeie van Eden se driekampatlete het verlede seisoen op nasionale en internasionale vlak gepresteer en die Edenbestuur wil graag dié momentum behou.
In die naelren was Tim Toovey die eerste man oor die wenstreep met die jong Christian Hattingh kort op sy hakke. Gerrie Beukes was derde. Een van die gunstelinge, Franna Vorster, het 'n pap wiel gekry en kon slegs 'n vierde plek haal.
In die vroue-afdeling het die ervare Tina van Wyk stof geskop in die oë van die jong Jessica Devine en Sunet Liebenberg, wat onderskeidelik tweede en derde geëindig het.
Die volledige podiumuitslae was as volg:
Naelren (750m-swem, 20km-fietsry, 5kmhardloop)
Mans:
1. Tim Toovey (01:04:43); 2. Christian Hattingh (01:05:47); 3. Gerrie Beukes (01:07:21).
Vroue:
1. Tina van Wyk (01:16:27); 2. Jessica Devine (01:19:01); 3. Sunet Liebenberg (01:19:57). Spankompetisie:
1. Die span: Annemarie Cronje, Tanya Osborne en Madré van Zyl (01:12:53); 2. Super Duper: Anton Biehler, Sonja Biehler, Whayn Windwaai (01:15:57).
Super naelren (400m-swem, 10km-fietsry, 2.5km-hardloop)
Mans/seuns:
1. Joshua Vorster (00:36:35); 2. Morgan Jones (00:38:05); 3. Sebastian Swart (00:40:29).
Vroue/meisies:
1. Lomé Gouws (00:41:26); 2. Karli Lötter (00:44:29); 3. Leanne Viljoen (00:49:52).
Die volgende byeenkoms vir seniors (12 jaar en ouer) is op 1 Desember, wéér by
Groot Brak. Hierdie keer sal daar egter ook ‘n standaardwedren bygevoeg word vir die langasems (1.5kmswem, 40km-fietsry en 10km-hardloop).
Almal is welkom, beginners ook. Diegene wat nie padfietse het nie, is welkom om met bergfietse deel te neem. Spanne is ook welkom om in te skryf en op ’n aflosbasis deel te neem.
Wat die jonger atlete (ouderdomme 3 tot 13 jaar) aanbetref, sal die volgende driekampbyeenkoms op Vrydag, 8 November by Laerskool George-Suid plaasvind as deel van 'n ontwikkelingsliga vir laerskoolatlete onder leiding van oudSpringbok-driekampatleet, Franna Vorster.
Belangstellendes kan vir Corné Hattingh van Eden-driekamp kontak by 083 289 2544 of per e-pos by edentriathlon@gmail.com. Hou ook gerus Eden Triathlon se facebookblad dop vir driekamp- en dubbelkampnuus.