Verhogings in watertariewe ‘n kwelling
Connie Franzsen, skryf:
Hiermee my dank aan die Stadsraad vir hulle vooraf waarskuwings oor dam vlakke.
Ek wil egter my teleurstelling uitspreek oor die 50% verhoging in watertariewe as dam vlakke onder 50% daal.
Die verhoging sal geen druppel water in die damme plaas nie en ook weinig druppels uit die damme spaar.
Die Stadsraad moet eerder 'n duidelike perk stel, byvoorbeeld 15 of 20Kl per huishouding per maand en soortgelyk op besighede. Beboet die verkwister wat meer gebruik met R500/kl en as hy volhou om te oortree sit dan 'n vooraf betaalbare watermeter in en verkoop net die voorgeskrewe hoeveelheid per maand aan hom.
Deur die tarief te verhoof plaas die raad net meer druk op die spaarsamige gebruiker.
My gemiddelde water verbruik oor die afgelope 12 maande is 7.5kl per maand.
Ek stel voor dat die Stadsraad elke maand die 50 hoogste verbruikers se name en hoeveelhede publiseer sodat ons die verkwisters kan uitken.
Stadsraads lede behoort hulle kiesers te ken in sulke drastiese stappe soos hierdie verhoging alvorens dit geinplementeer word.
Ek is 'n ondersteuner van besparing en bewaring van ons waterbronne en sal die raad altyd steun maar nie ter wille van my ondergang nie.
Mosselbaai-munisipaliteit reageer:
Die 50% verhoging is ingevolge die tariefbeleid en tarieflys wat jaarliks saam met die begrotingsproses deur die raad goedgekeur word. Die motivering vir hierdie 50% verhoging in verbruikstariewe is tweeledig:
Eerstens om alle verbruikers te motiveer om water spaarsamig te gebruik en te motiveer om water te bespaar. Dit verg ‘n gesamentlike poging om ‘n daadwerklike verskil te maak.
Tweedens moet die additionele operasionele kostes van die ontsoutingsaanleg verhaal word.
Hierdie verhaling kan nie slegs van die hoë verbruikers gedoen word nie, aangesien die kostes die insetkostes van die totale watersisteem beïnvloed en dus die eenheidsprys om water te voorsien van alle water wat verkoop word, beïnvloed.
Om die verhoging van tariewe in perspektief te plaas sien die tabel hiernaas.
Uit hierdie (tabel) voorbeelde kan u sien dat hoe groter die verbruike, hoe groter raak die verskil in verhouding tot die normale heffing.
Dit is weens die tariefstruktuur wat in skale opgestel is en klaar ‘n mate van besparing aanmoedig.
Vir besonderhede oor die beperkings en toepaslike tariewe, word inwoners uitgenooi om die munisipale webwerf te besoek op https://bit.ly/2q3Wvz9
Die volgende waterbeperkings geld vanaf 1 November:
Die natmaak van tuine is beperk tot een uur per dag tussen 18:00 en 19:00 en ook beperk tot twee dae per week. Geen besproeiïngstelsels mag gebruik word nie. Huishoudings met 'n gelyke nommer mag slegs Maandae en Donderdae natlei. Ongelyke huishoudings word tot Dinsdae en Vrydae beperk.
Geen dakke, opritte en enige ander oppervlak kan afgespuit word nie. Voertuie mag nie met tuinslange gewas word nie.
Die vul van swembaddens by huishoudings is verbode.
Akkommodasie-ondernemings en hotelle moet by die munisipale bestuurder vir verligting in hierdie verband aansoek doen om swembaddens op te vul.
Identifisering van gebiede met 'n hoë waterdruk en / of hoë waterverbruik vir die installering van drukverminderings- en / of vloeiverlagingsapparate.
Die leser se voorstelle word opreg waardeer en sal oorweeg word met die opstel van die tariewe en begroting vir die volgende finansiële jaar.