Ontsoutingsaanleg aktief
Mosselbaai se seewaterontsoutingsaanleg, die grootste in Suid-Afrika, is teen 'n koste van R210 miljoen opgerig en is gesamentlik deur die Mosselbaai-munisipaliteit, nasionale tesourie en PetroSA befonds.
Die aanleg het in September 2011 die eerste vars water gelewer toe Mosselbaai die ergste droogte in 132 jaar beleef het, juis om watersekerheid vir die gebied te verseker. Mosselbaai was een van die SuidKaapse dorpe wat toe weens die droogte tot plaaslike rampgebied verklaar is.
Mosselbaai-munisipaliteit het met die 2010/2011 droogte die munisipale waterverbruik streng beperk en kon die maandelikse watergebruik met byna 50% verminder. Watervlakke in die damme het egter steeds gedaal. Teen Oktober 2010 was die Wolwedansdamvlak op slegs 15%. Daar is gevrees dat die dam teen die einde van 2010 sou opdroog. Die munisipaliteit was genoodsaak om stappe te neem om water volhoubaar te kon voorsien.
Bergingsvermoë
Die Mosselbaai-area kry drinkwater hoofsaaklik vanuit die Wolwedans- en Klipheuweldamme. Die bergingsvermoë van die drie grootste damme moet in ag geneem word wanneer damvlakke vergelyk word. Die Ernest Robertson-dam hou maar 410 Ml, voed veral die Brakke-area en vloei daarbenewens in die Wolwedansdam. Die hoër damvlak van die Ernest Robertsondam is dus nie noodwendig gerusstellend nie. Die Klipheuweldam is geleë in 'n sytak van die Groot-Brakrivier.
Mosselbaai-munisipaliteit het etlike maande gelede reeds pro-aktiewe stappe geneem en die departmentele riglyne vooruitgeloop deur nie meer water uit die Klipheuweldam te onttrek nie. Die Wolwedansdam, met 'n kapasiteit van 24 630 Ml bevat net meer as 82.5% van die totale waterbergingsvermoë van al drie die damme.
Vir geruime tyd moniteer die munisipale bestuurder, die ingeneurs en tegnici die waterverbruik vir die groter Mosselbaai weekliks ter wille van effektiewe risikobestuur.
Ten volle operasioneel
Die ontsoutingsaanleg is deurentyd behoorlik in stand gehou as 'n ten volle funksionele fasiliteit in ooreenstemming met die onderskeie wetgewende riglyne, prosesse en standaarde. Aangesien water in Suid-Afrika toenemend skaarser word, is die ontsoutingsaanleg 'n onontbeerlike bate vir die Mosselbaai-gemeenskap. Weens die ontsoutingsaanleg is Mosselbaai een van weinig munisipaliteite met bo-gemiddelde watersekerheid - onontbeerlik vir ekonomiese ontwikkeling en potensiële beleggings. Water wat deur die ontsoutingsaanleg gelewer word, is egter duur en die bron behoort ter wille van bekostigbaarheid as 'n laaste opsie beskou te word.
Lewer water
Die ontsoutingsaanleg is reeds sedert begin Oktober 2019 in gebruik en lewer tans ongeveer 5 Ml drinkwater per dag teen ‘n koste van ongeveer R14 / kl.
Die ontsoutingsaanleg kan tot 15 Ml water per dag lewer, heelwat meer as die werklike huidige munisipale waterverbruik.
Tydens die maandelikse raadsvergadering op Donderdag, 26 September vanjaar het die raad waterbeperkings en die aanbeveling aanvaar dat die ontsoutings- en herwinningsaanlegte op volle kapasiteit in bedryf gestel sal word volgens die bedryfsreëls van die departement van water en sanitasie indien en wanneer die damvlakke tot onder 30% daal.
Die hoër damvlak van die Ernest Robertson-dam is dus nie noodwendig gerusstellend nie.
Wisselvallige klimaat
Mosselbaai ondervind periodiek ernstige droogtes. Kenners waarsku weer teen die wisselvallige weersomstandighede. Die oorstromings in 2006/2007 is in 2009/2010 gevolg deur die ergste droogte in die geskiedenis van die Suid-Kaap, wat gevolg is deur 'n vloed in 2011.
Tans flikker die waarskuwingsligte weer. Reeds sedert die maandelikse raadsvergadering in September waarsku die munisipaliteit inwoners om water spaarsamig te gebruik en is herhaaldelik ‘n 10% vrywillige waterbesparing versoek.
Die besparings wat vanaf 1 November geld, is ingevolge die toepaslike bywette en beleide ingestel.
Vir alle waterverbruikers geld 'n verhoogde tarief volgens die goedgekeurde tarieflys.
Sien die tarieflys hier: https://bit. ly/2q3Wvz9