Ry versigtig op Georgeweg
Motoriste word gemaan om veral na donker baie versigtig op Georgeweg te ry. Die groot rioollyn van ongeveer 350 mm in deursnee wat Mosselbaai met die Voorbaaipompstasie verbind, het Saterdagoggend verstop geraak. Hierdie verstopping het tot gevolg gehad dat net meer as 200 meter van die pypleiding in Georgeweg vervang moet word.
Mosselbaai-munisipaliteit vra motoriste om verskoning vir die ongerief weens die noodwendige padwerke in Georgeweg.
Die rioollyn wat vervang moet word, is egter onder die ryvlak geleë.
Dit bring mee dat die ryvlak opgekap moet word en die gevolglike herstelwerk sal na verwagting sowat 'n week tot 10 dae duur, afhangende van die beskikbaarheid van materiaal.
Motoriste wat vanaf De Bakke na die middedorp onderweg is, sal steeds met Georgeweg kan ry. Motoriste wat vanaf die middedorp in die rigting van Santos wil ry, word egter via Langstraat herlei.
Alles moontlik is gedoen om matige rioolstorting wat voorgekom het, te beperk. Geen verdere rioolstorting word op Santosstrand verwag nie. Om te verseker dat strandgangers nie aan die klein hoeveelheid riool wat via die stormwaterstelsel tot op die strand gevorder het, blootgestel word nie, is die area gepas afgebaken.
Aanvanklik is gereken dat die verstopping, wat direk voor die kantore van die direktoraat infrastruktuurdienste onstaan het, gelokaliseerd is. Nadat begin is met die herstelwerk, is verdere probleme waargeneem wat meegebring het dat ‘n kontrakteur se dienste ingeroep moes word. Na deeglike ondersoeke is tot die slotsom gekom dat dele van die pypleiding vervang sal moet word.
Na verwagting sal die materiaal op Maandag, 11 November gelewer kan word.