Toerisme-veldtog van groot waarde
Die Nasionale Akkommodasie Assosiasie van Suid-Afrika (NAA-SA) het vanjaar in samewerking met 'n aantal privaat toerismeorganisasies en staatsinstellings 'n landswye veldtog aangebied om veral die kleiner akkommodasie-instellings oor belangrike toerisme-aangeleenthede in te lig.
Plaaslik, het die Mosselbaai Gastehuisgilde hierdie geleentheid op 30 Oktober in die ATKV, Hartenbos se ouditorium aangebied.
Sowat 50 mense uit die Tuinroete het die geleentheid bygewoon. Rosemarie van Staden, voorsitter van die NAA-SA, het die vergadering professioneel gelei, waartydens verskeie sprekers waardevolle inligting oorgedra het.
Van Staden het die belangrikheid om aan ‘n nasionale assosiasie te behoort beklemtoon. Sy het verduidelik dat so ‘n organisasie baie meer as individue kan vermag deur direkte toegang op nasionale vlak te bewerkstellig en 'n groter bedingingsmag vir sy lede te weeg bring.
Lara Mizen van BRYTE het klem gelê op die belangrikheid, asook voordele van die korrekte versekering vir die onderskeie toerismebedrywe.
Louise Godwin, hoof-assessor van die Toerisme Graderingsraad in die Wes-Kaap (TGCSA), het gesê dat daar vanjaar meer kategorieë vir die kleiner akkommodasie instellings bekend gestel is. Daar is ook nuwe toevoegings tot die stergradering gedoen om 'n beter omskrywing van die geriewe aan die voornemende gas te gee. 'n Nuwe premiumkategorie is ingestel vir die vyfsterinstellings wat buitengewoon hoë standaarde handhaaf.
JURNI is ‘n nuutgestigte organisasie deur National Tourism Visitor Information System (NTVIS) en is ‘n genootskap tussen publieke en die privaatsektor wat deur die departement handel en nywerheid onderskryf word. JURNY is 'n eenstopbesprekingspunt vir toeriste wat Suid-Afrika besoek. Daar is ook ‘n toep vir alle toeriste, genaamd MY SAPS wat tydens noodgevalle gebruik kan word om kontak met die naaste polisiestasie te maak. Boitumelo Moleleki van die Tourism Business Council of SA (TBCSA) verduidelik waarvoor die TOMSA 1% vrywillige heffing ingestel is. Hierdie heffing word onder andere deur SA Toerisme gebruik om die kleiner toerisme-organisasies te ondersteun om aan buitelandse skoue deel te neem en om bemarkingsmateriaal op te stel. Instansies wat die TOMSA-heffing invorder, kwalifiseer vir verdere afslag op hul stergradering. Moleleki het ook die rol van die Tourism Safety Inititive (TSI) as veiligheidsondersteuningsnetwerk vir toerisme verduidelik. Die SA National Convention Bureau (SANCB) is gestig om SA as konferensie bestemming te bemark en het reeds verskeie internasionale konferensies na SA gebring. Daar word ook gepoog om kleiner internasionale konferensies na kleiner dorpe te bring.
Die geleentheid is afgesluit met die voortrelike woorde: "Every job is a selfportrait of a person who did it. Autograph your work with excellence."
Daar is vanjaar meer kategorieë vir die kleiner akkommodasie instellings bekend gestel.