Feetjies ‘toor’ met koeke
Die Cake Off, wat vanjaar vir die vyfde keer aangebied is, spog met 'n rekordaantal inskrywings. Van die 13 inskrywings, het 11 deelnemers uiteindelik hulle smaaklike skeppings voorgesit aan die beoordelaars. Die paneel het bestaan uit twee gekwalifiseerde sjefs, lektor Ronell Stopforth en gastehuiseienaar, Ian Perryman, asook twee vorige Cake Off-wenners, Cecilia van der Heyde en Hillary Otto. Nagenoeg 240 gaste het die geleentheid bygewoon. Die gaste het beslis nie net uit vroue bestaan nie, maar ook kinders en wonder bo wonder, ook mans. Dit boonop in aanloop van en terwyl die finaal van die Wêreldbekerrugbytoernooi aan die gang was. Vanjaar se tema, was die wêreld van feëtjies. Koeke was ware sprokiestonele, mosbegroei en vol boombas met sampioene wat as piepklein kabouterhuisies gebruik word. Oral was die oulikste klein feëtjies en kaboutertjies te siene - amper te mooi om te eet. Maar inderwaarheid, kan 'n koek slegs beoordeel word, as dit boonop soos 'n bobaaskoek proe. Elke deelnemer moes een koek bak, 12 kolwyntjies en 12 bederfhappies voorberei. Die kriteria waaraan voldoen moes word, is dat daar 'n tuin, feetjies, blomme en sampioene moes wees. Die beoordelaars het veral gekyk na netheid, aanbieding, oorspronklikheid, smaak en of die tema suksesvol uitgebeeld is. Alet du Toit was vanjaar vir die tweede keer die wenner in die kompetisie. Haar sjokoladekoek was onverbeterlik volgens die beoordelaars. Aangesien daar werk van sulke besonderse gehalte gelewer is, het die beoordelaars ook 'n prys toegeken vir uitstekende suikerkuns. Hierdie prys is toegeken aan Sandy Lombard. Die prys vir die gaste se gunsteling, asook beste smaak is aan Joelisna Janse van Rensburg toegeken. Christel Jacobs is benoem as die beste #newbie. Volgens Trudi Stander, het die Cake Off so gewild geword, dat daar in 2020 in Mosselbaai, George en Oudtshoorn aparte geleenthede aangebied sal word. Die drie wenners sal dan na verwagting teen mekaar kompeteer by 'n grand finale.