Groter netwerk maak impak
Suid-Afrika word tans gekonfronteer met 'n welsynskrisis. Meer as 17 miljoen mense ontvang maatskaplike toelae. Meer as 9 miljoen mense is werkloos. Te midde hiervan, word die finansiële volhoubaarheid van baie gemeenskapsorganisasies en instansies ernstig bedreig.
Helplift-netwerk fokus op die disfunksionaliteit, gediskonnekteerde en ontmagtigde gemeenskappe. Gebaseer op navorsing, bestaan daar 'n groot behoefte in gemeenskappe aan beter koördinering en kommunikasie van gemeenskapsaksies ten opsigte van sosio-ekonomiese ontwikkeling.
Voortspruitend uit 'n behoefte van kerkgenootskappe in Mosselbaai, aan groter betrokkenheid by die gemeenskap, is Helplift Groter Mosselbaai gestig as HUB 018 van die Helplift-netwerk.
Wie trek voordeel?
Die Helplift Netwerk se hubs is daar tot voordeel van alle geregistreerde gemeenskapsorganisasies en instansies wat fokus op behoeftiges en minder bevoorregtes.
Helplift funksioneer op 'n nasionale vlak met internasionale verbintenisse.
Helplift is geregistreer as nie-winsgewende organisasie (registrasienommer 2008/027074/08 en nommer 930047169).
Helplift groter Mosselbaai maak gebruik van die groter netwerk se infrastruktuur (byvoorbeeld ouditeure, bankrekening, bestuurstruktuur en dies meer).
Helplift is ook geregistreer om aan skenkers Art 18(a)-belasting en BBEEEsertifikate uit te reik.
Helplift het toegang tot die Noordwes Universiteit se navorsingsfasiliteite.
Suksesse
Landswyd het Helplift reeds heelwat bewese suksesse behaal. Moreleta Park het byvoorbeeld tydens 2018 dienste en produkte ter waarde van R1,8m gefasiliteer en Driehoek Van der Bijlpark, dienste en produkte ter waarde van R1.3m.
"Die Helplift-organisasie vervul grootliks 'n fasiliteringsrol om gewers en behoeftige ontvangers bymekaar uit te bring en opereer op vyf platforms," verduidelik die waarnemende hub-bestuurder, Des Sampson.
Dit beskik oor 'n netwerk waar die lewer van produkte en dienste gefasiliteer word. So lewer byvoorbeeld dokters, tandartse, loodgieters, skoonheidsalonne, en so meer hulle dienste aan onder hul eie voorwaardes. Helplift fasiliteer die proses. 'n Gemeenskapstoor word bedryf waar goedere en produkte wat ontvang en aan behoeftige ontvangers versprei word. Vaardigheidsopleiding word aan werkloses gebied. Ondernemingsgees word binne die raamwerk van 'n "ondernemingsinkubator" by leerders gestimuleer, sodat hulle hul eie ondernemings kan vestig.
Met die impakfonds, word kontant wat uiteindelik vir projekimplementering aangewend word, ontvang.
"Maatskaplike en ander organisasies wat ook op hierdie terrein werksaam is, se aksies vind normaalweg in isolasie plaas en word nie gekoördineer nie. Dit is wat Helplift Groter Mosselbaai graag van hulp wil wees. Ons wil niks by iemand wegneem nie, maar eerder poog om saam 'n groter impak te maak. Die gedagte is om die gemeenskapskultuur in die groter Mosselbaai te transformeer na een waar mense mekaar help en ondersteun."
Wie kan 'n bydrae maak?
"Enigiemand, 'n besigheid of instansie kan betrokke raak."
Daar is verskeie maniere om 'n bydrae te maak:
dienste en goedere word aangebied op eie voorwaardes; gee van dit wat jy reeds het; deel vaardighede en ervaring met mense wat gretig is om te leer;
belê in die impakfonds om noodsaaklik projekte in die gemeenskap te implementeer;
word 'n vrywilliger deur 'n organisasie te verteenwoordig of om dienste en produkte te help fasiliteer.
Kontakbesonderhede
Die plaaslike hub word bestuur deur 'n groep vrywilligers met streng Christelike waardes. Vir meer inligting, kontak: Des Sampson (082 651 2006), Dawid Scholtz (084 624 6612), Sybil Coetsee (071 473 6942), Eric Nelson (082 925 2879), Dirk Coetzee (082 855 9053) of Kobus Huyshamen (082 773 9320).
Besoek ook die webwerf:www. helpliftnetwork.co.za of die facebookblad www.facebook.com