Week vol hoogtepunte
Sjoe, wat 'n naweek! Saterdag, 2 November sal vir altyd onthou word as 'n dag wat ons nasie weer deeglik saamgesnoer is. By die Mosselbaaigholfklub het hordes mense, bekend en onbekend, opgedaag om deel te wees van die geskiedkundige gebeurtenis wat in 80 minute voor ons afgespeel het. Die passie, vernuf en veggees wat deur ons Springbokkke ten toon gestel is, het ons hoendervleis gegee en die oorwinning oor Engeland was oortuigend en voorwaar welverdiend.
Aan Graeme Viljoen (algemene bestuurder van Mosselbaai-gholfklub) wil ons baie dankie sê vir die besondere atmosfeer en diens wat jy en jou vriendelike personeel verskaf het om hierdie grootse gebeurtenis vir almal so aangenaam te gemaak het. Ons is trots op julle en waardeer julle opreg!
Woensdag
Die Sakemanne-borgdag wat op 30 Oktober plaasgevind het, het gesorg dat 132 spelers mekaar die stryd in die gekombineerde stablefordkompetisie aansê. Bennie Badenhorst en Christo Langenhoven wat deesdae op 'n waterdieet is, het maklik hulle teenstanders op 77 punte geklop. Hulle skryf hulle sukses toe aan vetjies wat afgeskud is en die ou soepelheid wat weer terug in hulle swaai is. Welgedaan Manne. Die naaswenners op 'n stewige 75 punte was Anton Izaakse en Stefan van Vuuren. Twee ou karperde, Martiens Mulder en Johan Buys se 74 punte het aan hulle die derde plek besorg.
Die sakemanne het gesorg dat die volgende spelers ook met heerlike pakke vleis huiswaarts gekeer het: B Vermeulen en J Lourens (72 punte), K Snyman en G
Pieterse (71 punte) en J van Niekerk Basson en sy Spookmaat (71 punte). Hartlike dank aan al die sakemanne vir hulle reuse borgskap!
Saterdag
Na die opwinding van Saterdag se Rugbywêreldbekereindstryd, het die feesvieringe gesorg dat slegs 'n handjievol spelers nog kans gesien het om ook nog 'n ronde gholf ingepas te kry. Michael Kriel en Barry Vermeulen het hulle opgewondenheid na die gholf oorgeplaas en op 43 punte het hulle die individuele stableford kompetisie oorheers. Na die uittelproses is Michael eerste geplaas met Barry in die tweede plek.
Clive Theys (37 punte) en Oosie Oosthuizen (36 punte) was die ander wenners.