Viertrek-ekspo sorg vir pret
Die eerste Garden Route 4 x 4 Expo wat die afgelope naweek op die plaas Bartelsfontein gehou is, het besoekers van oral getrek. Boonop het plaaslike, asook uitstallers van elders in die land die geleentheid gebruik om hul produkte aan die publiek bekend te stel.
Hoewel verskeie ander feeste die naweek aan die gang was, was die organiseerders van die ekspo baie in hul skik met die opkoms en veral die vol tent tydens die Wêreldbekerrugbytoernooi se finaal wat op die grootskemr uitgesaai is.
Volgens Petra Sachse, een van die organiseerders van die ekspo, gaan volgende jaar se ekspo nog groter wees. Sachse het bevestig dat hulle 'n nege jaar kontrak met Bartelsfontein se eienaars Henry en Junene Muller het. Sowat vier hektaar is vanjaar in beslag geneem vir die hindernisbaan, maar die beplanning is om dit volgende jaar aansienlik te vergroot. Daarmee saam gaan 'n bergfietsbaan gebou word. 'n Verder gedeelte sal afgestaan word aan sportaktiwiteite. Die huidige tentdorp gaan ook aansienlik groter gemaak word.
Na die ekspo die afgelope naweek het baie groot name in die 4 x 4-wêreld na vore gekom om deel van hierdie jaarlikse geleentheid te word. Die organiseerders het na oorweging van die mees geskikte tyd van die jaar en natuurlik alle ander faktore in ag geneem en besluit dat volgende jaar se ekspo op 2, 3 en 4 Oktober gaan plaasvind.
"Die Tuinroete en inwoners van Mosselbaai kan hulle maar reg maak vir 'n ekspo wat jaarliks groter en groter gaan word en vir elkeen, oud en jonk iets gaan bied. Moenie die 2020 Tuinroete Ekspo misloop nie."