Sonskynvalleiers deel in jongste tegnologie

'n Splinternuwe e-Sentrum met 13 rekenaars is op Maandag, 11 November op Sonskynvallei geopen. Die sentrum, ter waarde van R750 000 is gevestig danksy Transand wat onder meer die rekenaars, die werkbanke en die gebou geborg het. Inwoners van Sonskynvallei kan voortaan van die sentrum gebruik maak. Elke gebruiker kry 'n uur gratis internet per dag en kinders mag tot 10 bladsye gratis druk vir skooltake. Die projek het ook permanente werk verskaf aan nege inwoners wat deel van Transand se bouspan gevorm het asook twee permanente werknemers wat ook op Sonskynvallei woon en toesig by die sentrum hou en opleiding sal gee aan die gemeenskap.

Die planne vir die projek is deur die Mosselbaai-munisipaliteit goedgekeur en die groenlig is gegee deur die WesKaapse regering se departement van minerale hulpbronne.Tydens die opening van die sentrum het die uitvoerende burgemeester, raadsheer Harry Levendal gesê die sentrum gaan 'n enorme verskil in die mense van Sonskynvallei se lewens maak. Levendal het gesê hy maak geen geheim daarvan dat hy van 'n plaasgemeenskap, Brandwag kom nie, en nie welaf grootgeword het nie. "Kinders woon in huise van tot ses in 'n gesin en dit maak dit dikwels moeilik om te leer. Baie kinders moet by kerslig leer, maar nou kan hulle na skool na die sentrum kom en hier leer."

Die gebruik van die sentrum is gratis vir die inwoners van Sonskynvallei en volwassenes word aangemoedig om die sentrum soggens te besoek sodat kinders dit naskool in die middae kan gebruik. 'n Sekuriteitsmaatskappy sal oor die sentrum wag hou en Cape Access bestuur die personeel sowel as die nodige sekuriteit.

Hilton Arends van die WesKaapse regering het tydens sy toespraak gesê die sentrum sal die kinders van Sonskynvallei die geleentheid bied om deel te raak van die tegnologie. "Kinders hoef nie slegs die sentrum te besoek om aan skooltake te werk nie, maar kan dit ook gebruik om die internet te besoek."

Doktor Nwabisa Mgcotyelwa het gesê die sentrum verreik die gemeenskap van Sonskynvallei. Sy het Transand en in besonder die direkteur, Billy Robertson vir die inisiatief bedank.

Billy Robertson van Transand, dr Nwabisa Mgcotyelwa, Hilton Arends, uitvoerende burgemeester raadsheer, Harry Levendal en munisipale bestuurder, adv Thys Giliomee tydens die opening van die sentrum.

Hierdie kinders van Sonskynvallei geniet die jongste tegnologie en word bygestaan deur die sentrumbestuurder.

‘n Graad 5-leerder van Laerskool Hartenbos, en inwoner van Sonskynvallei gebruik die internet op een van die rekenaars in die sentrum.