Mosselbaaiers reik uit in droogte
'n Konvooi met twee vragmotors het gister, op Donderdag, 14 November vanaf Mosselbaai vertrek om gesinne in nood in Boesmanland van voedsel en noodsaaklike items te voorsien.
Plaaslike inwoner, Theuns Kritzinger, in samewerking met Burre Burger se droogtehulpprojek vertel tydens hul laaste uitreik op 14 Junie na die Boesmanland, het die Mossel Bay Advertiser se voorbladartikel aangaande hulle projek baie reaksie ontlok. Dit is aangesien die meeste skenkers wat betrokke raak, nie op sosiale media is nie. "Daar is reeds in die Boesmanland, Sutherland en Rietbron droogtehulpspense geopen wat met tyd aangevul word soos die nood roep," sê Theuns.
Die uitreik is na die Gamoeb- en Kliprand-omgewing in die Boesmanland om noodspense aan te vul. Noodsaaklike items is deur plaaslike inwoners en besighede van die Mosselbaai-omgewing geskenk. Daar is ongeveer 1 200 geskenkboksies en Kersgeskenke aan kinders, boere en boervroue. Twintig bokse stokvisfillette, een ton gevriesde bloubessies en 2.5 ton verwerkte een kilogram vleispakkies word gestuur. Daar is 1 200 tweeliter koeldranke en ongeveer 2 000 vyfliter drinkwater. Saam met die vrag gaan daar doseermiddels vir diere, sonbrandmiddels, medikasie vir menslike gebruik, skoonmaakmiddels en kruideniersware vir ongeveer 200 gesinne en 'n ruim hoeveelheid klere geskenk word. Dit sluit 50 oorpakke in.
Verskeie vragte kom vandag, Vrydag 15 November, van orals in die land in die Boesmanland bymekaar om die spense uit te sorteer. Saterdag word 10 vragte (+- 330 ton) pitmielies vanaf die Vrystaat afgelaai, waar dit dan verwerk, gesak en versprei word aan omliggende areas. Naby Gamoeb gaan ’n opelugvertoning met kunstenaars gehou word om die plaaslike gemeenskap te vermaak. Sondag is daar ‘n kerkdiens met nagmaal voor die groepe weer vertrek.
Koop 'n rooster
Volgens Theuns was daar op 2 en 3 Augustus in Brits ‘n droogtehulpkonsert waar kunstenaars ‘n gratis vertoning gelewer het. Die opbrengs is in die droogtehulpfonds inbetaal om sodoende veevoer, diesel of vervoer te kan bekostig.
Burre Burger het dit goed gedink om die kunstenaars elkeen te beloon met ‘n kitaarvormige braaivleisrooster van vlekvrye staal. Die roosters is vervaardig deur JK Staal/Prima Gates in Mosselbaai. Prima Steel het ‘n sekere hoeveelheid roosters teen kosprys vir die droogtehulp gemaak wat nou te koop aangebied word. Daar is slegs ‘n beperkte hoeveelheid oor. Diegene wat kontant wil bydra tot die droogtehulp en nie artikels wil skenk nie, kan ‘n rooster aankoop en die wins word sodoende vir droogtehulp geskenk. Plaaslike inwoners van Mosselbaai gaan saamry om ondersteuning te bied en ontvangers van skenkings te bemoedig.
Daar word nou beplan om die volgende droogtehulpspens op te rig in Calvinia teen einde November. Enige skenkings steeds welkom. "Dit is ‘n volhoubare program en daar gaan landswyd uitreike gehou word totdat die droogte gebreek is," sê Theuns. Daar is 'n droogtehulp depot in Gerickestraat langs Baruch’s Coffee Roastery in Voorbaai waar skenkings gemaak word. Hierdie skenkings sal oor ‘n tydperk aangewend word om die spense aan te vul soos nodig. Enigeen wat bydraes wil lewer vir die volgende uitreik of roosters wil koop, kan Theuns kontak (082 376 5115).