Samewerking bo
Die Glentana-buurtwag het op Donderdag, 7 November ‘n ruim hupstoot van die Gleniqua-belastingbetalservereniging ontvang vir die beveiliging van die area. Die voorsitter van die belastingbetalersvereniging, Daan Smith het die munisipaliteit bedank vir die uitstekende samewerking oor die jare heen wat die instansie in staat gestel het om fondse aan die buurtwag te bewillig. “Die samewerking met die munisipaliteit op projekte soos die blouvlagstatus vir Glentana se strand, asook ander diensleweringsinisiatiewe het meegebring dat die belastingbetalersvereniging self nie meer soveel fondse vir dié projekte hoef te bewillig nie. “Die een knelpunt wat wel steeds aandag en fondse benodig, is die veiligheid van ons gemeenskap. Glentana en omliggende gebiede word omsoom deur dig beboste areas. Die skenking sal aangewend kan word vir die aankoop van kameras wat deur die buurtwag met groot vrug gebruik sal kan word om voorkomend misdadigheid te stuit,” het Smith gesê.
Die voorsitter van die Glentanabuurtwag, Iando Minnie het die belastingbetalersvereniging en munisipaliteit vir hul betrokkenheid by die voorkoming van misdadigheid bedank. Hy het gesê die kameras sal voorkomend beweging in die area kan monitor en sal bydra om misdadigers aan te keer.
Raadslid Dellemijn het die samewerking tussen die buurtwag en belastingbetalersvereniging geloof. “Dit is samewerking soos hierdie, en mense wat opofferend van hul tyd en energie gee wat gemeenskappe veiliger maak sodat die aard en karakter daarvan behoue kan bly. Mosselbaai-munisipaliteit plaas ‘n baie hoë premie op gemeenskapsveiligheid want dit is onontbeerlik vir ontwikkeling en vooruitgang. Ek bedank elke inwoner vir jul bydraes en betrokkenheid by die beveiliging van gemeenskappe.”